`

ޝަމީމާ ޔަޙްޔާގެ ނަމުގައި ވެބްޕޭޖެއް ހެދުމުގެ އެންމެ ބޮޑު މަގުސަދަކީ ޝަމީމާޔަޙުޔާ ތަރުޖާމާ ކޮށްފައިވާ ވާހަކަތައް އެއްތަނަކުން ކިޔާލަންލިބޭނެ ވަސީލަތެއް ގާއިމުކުރުމެވެ. ޝަމީމާޔަހްޔާގެ ތަރުޖަމާ ތަކަކީ މުޅިންވެސް އުރުދޫ ވާހަކަތަކުގެ ތަރުޖަމާ ތަކެކެވެ. ގާތްގަނޑަކަށް 50 ވާހަކައަށްވުރެ ގިނަ ވާހަކަ މިތަރުޖަމާ ކުރުމުގެ ސިލްސިލާގެ ތެރެއިން ޗާޕުކޮށްގެން ނެރެވިފައިވެއެވެ. ޝަމީމާޔަހްޔާގެ ހަޔާތުގައިވެސް ތަރުޖަމާކުރެވިފައިވާ ވާހަކަތައް އެއްތަނަކުން ކިޔާލަން ލިބޭނެގޮތަކަށް ބައްޓަން ކުރުމުގެ ވިސްނުން ގެންގުޅެފައިވާ ކަމުގެ ހެއްކަކީ ޝަމީމާދުނިޔޭގައި ހުންނަވައި، އޭނާގެ އެންމެ މަޝްހޫރު ދެ ވާހަކަފޮތް ކަމަށްވާ ”ފަހަރި“ އާއި ”ޒަހަމް“ މިދެވާހަކައިގެ ސޮފްޓްކޮޕީ ތައްޔާރުކޮށްފައި އޮތްއޮތުމެވެ.

މިވާހަކަތަކަކީ ޝަމީމާގެ ވަރަށް ބޮޑުމަސައްކަތް ތަކެކެވެ.  ވާހަކަ ތަކުގެ އިބާރާތްތަކަކީ ދިވެހިބަހުގެ ހަމަތަކަށް ފެތޭ އަދަބީގޮތުންވެސް އެއަށް އިންސާފުކުރެވިދާނެ ރީތި ދިވެހިބަހުންލިޔެފައިވާ ލިއުންތަކެއްކަމުން މިއީ ދިވެހިބަހަށްވެސް ލިބިފައިވާ ކުރިއެރުމެއްކަމަށް ދެކެމެވެ.

އެންމެބޮޑު އެއްކަމަކީ މިވާހަކަތައް ކިޔާލަން ބޭނުން ކޮންމެ މީހަކަށްވެސް ކިޔާލަން ލިބޭނެގޮތަށް މިވެބްސައިޓް ފަރުމާކުރުމެވެ. އަދި ޝަމީމާޔަހްޔާގެ މިބުރަ މަސައްކަތްތައް ހަދާނާއި ތާރީޚަށްޓަކައި ރައްކާކުރުމެވެ. 1980 ހިސާބުންފެށިގެން 1990 ގެ އަހަރުތަކާހަމައަށް ޝަމީމާތަރުޖަމާ ކޮށް ޗާޕުކޮށްގެން ނެރެފައި ހުރި ވާހަކަތައް ކިޔާލަން ބޭނުންވާ ފަރާތްތަކަށް އެންމެ ފަސޭހައިން ކިޔާލެވޭނެގޮތަކަށް ވީއެންމެގިނަ ވާހަކަ މިވެބްސައިޓަށް ލުމަށްގަސްދުކުރެވިފައިވެއެވެ. އެގޮތުން ފުރަތަމަ މި ފަށައިގަތީ ޝަމީމާގެ އެންމެ މަޝްހޫރު ދެވާހަކަ އަދި ޝަމީމާ ތަރުޖަމާ ކޮށްފައިވާ ”ސަލާހުއްދީނުލްއައްޔޫބީ ސޮލީބީންނާ ދެކޮޅަށް ކުރެއްވިޖިހާދުގެ ތާރީޚީސިލްސިލާގެ ތެރެއިން“ ، މިމައުލޫއުގެ ދަށުން ޗާޕުކޮށް ނެރެފައިވާ 4 ފޮތުންނެވެ.

ވެބްސައިޓް ހެދުމުގެ މަސައްކަތް ވަރަށްވެސް ދިގުލާ ހިނގައްޖެއެވެ. ޝަމީމާ ނިޔާވިތާ 12 އަހަރުވީއިރު ވެބްސައިޓެއް ފަރުމާނުކުރެވި ދިޔަދިއުމަކީ ވަރަށްދެރަކޮށް ދިމާވިކަމެކެވެ. މިހާތަނަށް ޕޭޖެއްހަދަން ކުރިމަސައްކަތް ކޮޅެއްގައި ނުޖެހިދިޔައީއެވެ. ވަރަށްގިނަ ސަބަބުތަކަކާއި ހެދިކަމަށް ދަންނަވަމެވެ.  ވެބްސައިޓެއް ފަރުމާކޮށް އަޕްލޯޑުކުރުމުގެ ފަންނުވެރިއެއްގެ އެހީތެރިކަން އޭގެ ފުރިހަމަ ގޮތުގައި އަޅުގަނޑުމެންނަށް (ޝަމީމާގެ އާއިލާއަށް ) ލިބުނުހިސާބުން ވެބްސައިޓް ފަރުމާކޮށް ވާހަކަތައް އަޕްލޯޑުކުރުމުގެ މަސައްކަތް ވަރަށް ހަލުއިކަމާއެކު ކުރިއަށް ގެންގޮސް ނިންމާލެވިއްޖެއެވެ.

ވެބްސައިޓް ފަރުމާކުރުމުގެ މަސައްކަތް ކޮށްދެއްވާފައިވަނީ ”އޮފީސްލެބްގެ“ ދެ ފައުންޑަރ އިމްރާން ރަޝީދު އާއި ރިޝްވާން ރަޝީދުއާ، މިދެބޭފުޅުންނެވެ. އަޅުގަނޑުމެންނަށް 12 އަހަރުން ނުކުރެވިގެން އުޅުނުމަސައްކަތެއް ކޮށްދެއްވައި މިވެބްސައިޓް ހަގީގަތަކަށް ހައްދަވައިދެއްވީތީ އެދެބޭފުޅުންނަށް ވަރަށްބޮޑަށް ޝުކުރުދަންނަވަމެވެ. މިޕޭޖުހައްދަވައިދެއްވީ ވަރަށް ޚާއްސަކަމެއްދެއްވައި އަމިއްލަމަސައްކަތެއްފަދައިންނެވެ. މިމަސައްކަތްކޮށް ދެއްވައި އަޕްލޯޑުކުރުމާއި އަދި ވާހަކަތަކުގެސޮފްޓް ކޮޕީތައް ތައްޔާރުކުރުމުގައި ދެއްވި އެހީތެރިކަމާ ބެހެއްޓެވިގާތްކަމަށް އަދިވެސް އެއްފަހަރު އިމްރާން ރަޝީދުގެ ދެމަފިރިކަނބަލުންނަށް ވަރަށް ބޮޑަށް ޝުކުރުދަންނަވަމެވެ.

އަޅުގަނޑުމެންގެ އެދުމަކީ ޝަމީމާޔަޙްޔާގެ ވާހަކަތައް ކިޔާލަން ބޭނުންވާ ކޮންމެމީހަކަށްވެސް މިސައިޓް މެދުވެރިކޮށް ވާހަކަތައް ކިޔާލެވޭގޮތްވުމީ އަޅުގަނޑުމެންނަށް ލިބޭ ވަރަށްބޮޑު އުފަލެކެވެ. އަޒުމަކީ ޝަމީމާގެ ހުރިހާވާހަކައެއް ވެސް ކިޔާލަން ލިބޭގޮތްވޭތޯ ބެލުމެވެ. ޖުމުލަގޮތެއްގައި ހުރީސްޓެންސިލް ޒަމާނުގެ ޗާޕުތައްކަމުން އެފޮތްތައް ސްކޭންކޮށްފައި އަޕްލޯޑުކުރަންބަލާއިރު އެފޮތްތަކުގެ ޗާޕުހުރިހާލަތުގެގޮތުން ކިއުންތެރިންނަށް ކިޔާލަން ފަސޭހަނުވެދާނެތީ ގަސްތުކުރެވިފައިވަނީ ސޮޕްޓްކޮޕީސް ޓައިޕްކޮށް އަޕްލޯޑުކުރުމަށެވެ.

ޝަމީމާގެ ފޮތްތައްކިޔުއްވާ ހިތްޕުޅުވާ ގިނަބޭފުޅުން މިމަސައްކަތުގައި އަޅުގަނޑުމެންނަށް އެއްބާރުލުންދެއްވައި ތަރުހީބުދެއްވާނެކަމަށް ހީކުރަމެވެ. ޖުމުލަގޮތެއްގައި ދަންނަވާނަމަ ޝަމީމާއަކީ، އެކުވެރިންގެ އެކުވެރިއެކެވެ.، ދަރިންނަށްޓަކައި ވަރަށްލޮބުވެތި މަންމައެކެވެ. ފިރިކަލުންނާ އަދި މުޅި އާއިލާއާއި ދަންނަރައްޓެހި ރަހުމަތްތެރި އެންމެންގެ ލޯބިހޯދައިގެން،ހުރި އެންމެންނާވެސް ގުޅޭ ޙުލްގްހެޔޮ ބޭކަނބަލެކެވެ. މާތްﷲ އެމަރުހޫމާގެ ފުރާނައަށް ހެޔޮރަހުމަތްލައްވައި ލަހައްޓަވާށިއެވެ. ސުވަރުގޭގެ މަތިވެރިނިއުމަތް މިންވަރު ކުރައްވާށިއެވެ. އާމީން.