`

ޝަމީމާ ޔަޙްޔާގެ ތައާރަފެއް ލިޔެލާއިރު އެއީ ކާކުގެ ދަރިއެއްކަން ލިޔެލުމަކީ އެދެވިގެންވާ ކަމެއްކަމަށް ޤަބޫލުކުރަމެވެ، ޝަމީމާ ޔަޙްޔާ އަކީ ޖަމާއަތްތެރި އެދުރު އާދަމް ކަލޭފާނުގެ ޔަޙްޔާ އާދަމް (ޖަމާއްތެރި ދޮހޮއްތު) ގެ ޝަމީމާ އެވެ. މަންމައަކީ މާލެއިން ކ.އަތޮޅު ގާފަރަށް ހިޖުރަކުރި މާލެ އިބްރާހިމް ކިޔާމީހެއްގެ އަބޫބަކުރުގެ ފާތިމަތު އަބޫބަކުރެވެ. އާއްމުނަމުންނަމަ ޖަމާއްތެރި ފާތުމާފުޅެވެ.

ޝަމީމާގެ ތަރުޖަމާތަކުގައި އެޑްރެހަކަށް އޮންނަ ބާޣުބަހާރު މިނަމަކީ ޝަމީމާގެ ވާހަކަ ތަކުން ފެންނަ އޭނަގެ މަޝްހޫރު އެޑްރެހެެވެ. އެނގިފައި އޮތްގޮތުން އެއްއިރެއްގައި މާލޭގެ ހަތަރު އަވަށުގައި އެއް ނަމެއްކިޔާ ހަތަރު ގެވެސް ހުރެއެވެ. އަދި ގިނަފަހަރަށް އެގެކަކީ އާއިލީ ގޮތުން ގުޅިފައިވާ މީހުންއުޅޭ ގެތަކަކަށް ވެސް ވެއެވެ. އެގޮތުން މާލޭގެ އަވަށްތަކުގައި ހުރި އެއް ނަމެއްކިޔާ ގެ ތަކަށް އެހެން ނަމެއްދިނުމުގެ ގޮތުން އަވަށްތަކުގައިހުރި ބަހާރުގެ ތަކުގެ ނަން ބަދަލުކޮށް މާލޭގަ ކޮންމެވެސް އެއްއަވަށެއްގައި ބަހާރުގެ ކިޔާ އެއްގެ ބަހައްޓާފައި އެހެން އަވަށްތަކުގައި ހުރި ބަހާރުގެ ތަކުގެ ނަންބަދަލު ކުރަން ޖެހުނީކަމަށް ވެއެވެ. އެގޮތުން ޝަމީމާ ޔަޙްޔާގެ ބައްފަ ޖަމާއްތެރި ދޮހޮއްތުގޭގެ ނަމުގަ ކުރިންވެސް އޮތް ބަހާރު ކަނޑާލަން  ބޭނުންނުވެ ބާޣުބަހާރު ކީކަމަށް ބުނެއެވެ. މިވާހަކަ ލިޔެލަން ޖެހުނީ ޝަމީމާގެ ތަރުޖަމާ  ތަކުގައި އޮންނަ އެޑްރެހަށް ވެސް އުރުދޫ ނަމެއް ކިޔާތީ އެކަން ވަރަށް ގިނަމީހުން ފާހަގަކުރާތީއެވެ.

ޝަމީމާ ޔަޙްޔާ ގެ ތަރުޖަމާ ގެ މަސައްކަތްތައް ތަކުގެ އަސްލު ފެށުމެއްކަމަށް ބެލެވެނީ ޝަމީމާ އުރުދޫބަހަށްދިން ޝައުގުވެރިކަމުގެ ތެރެއިންނެވެ. ޝަމީމާ ޔަޙްޔާ އަކީ މަދުރަސަތުލް އަމީނިއްޔާ ފުރަތަމަ އިނގިރޭސިމީޑިއަމް އަށް ހިނގައިގަތް އިރު އެ ސްކޫލުގައި ކިޔަވަމުން ގެންދިޔަ ދަރިވަރެކެވެ. ދިރިއުޅުމުގައި ދިމާވި ބަދަލެއް ގެ ސަބަބުން ވަރަށް ޅައުމުރުގައި ސްކޫލުން ވަކިވެ ޒަވާޖީހަޔާތަކަށް ކުރިމަތިލާން ޖެހުނެވެ. ވަރަށްކިޔަވާ ހިތުން ސްކޫލުގައި އުޅެއުޅެހުއްޓައި ޝަމީމާގެ އާއިލާގެ ނިންމުކަށް ބޯލަނބައި ކިޔަމަންތެރިކަން އަދާކުރަން ޖެހުނީއެވެ.

ތައުލީމު އުނގެނުމުގެ ޝައުގުވެރިކަން ހިތުގައި އޮތްއިރު ސްކޫލު ދައުރު އެފަދަ ކުއްލިގޮތަކަށް ނިންމާލަންޖެހުނު ޖެހުމަކީ އެކަމުން ވަރަށް ހިތާމަލިބުނުކަމެކެވެ. ﷲގެ ނިޔާއަށް ޝުކުރުކޮށްލައި އުމުރުން އެންމެ 14 ވަރަކަށް އަހަރުގައި ކައިވެންޏެއްކޮށް ދިރިއުޅުމެއް ފަށަން ޖެހުނެވެ. ވަރަށް އަވަހަށް ގާތްގާތުގަ ދެތިންކުދިންގެ މަންމައަކަށްވެ ދިރިއުޅުމުގެ ޒިންމާތަކަށް ފަށައިގަންނަން ޖެހުނުކަމުގައި ވިޔަސް، ހިތުގައި ތައުލީމަށް އޮތް ލޯބީގެ ނަތީޖާ އަކީ އެދުވަސްވަރުގެ އާއްމު  ތައުލީމުކަމަށްވާ ސަނަދު ނެގުމުގެ ކުލާސްތަކުގައި ބައިވެރިވެ ސަނަދުތައްނަގައި ހެދިއެވެ. މުސްކުޅި މައިންބަފައިންނާ އެޒަމާނުގެ އާދަކާދައިގަ ހިމެނޭގޮތުން ގޭގައި ދިރިއުޅެމުންގެންދާ ގާތްތިމާގެ މީހުން ބެލެހެއްޓުމުގެ ޒިންމާތައް އުފުލަން ޖެހިފައިވުމާއެކު އުމުރުން 18 ވަރަކަށް އަހަރުގައި ސަރުކާރުގެ ވަޒީފާ އަކަށް ވަނެވެ.

އެންމެ ގިނަދުވަހު ޝަމީމާ ވަޒީފާ އަދާކުރީ އެޓަރނީޖެނެރަލް ގެ އޮފީހުގައެވެ. އަދި އިތުރުން ސެންސަރު ބޯޑުގަޔާއި، އޭރުގެ ދިވެހިބަހާއި ސަގާފީ މަރުކަޒުގައި ވަޒީފާ އަދާކުރިއެވެ. މުޅިއެކު 35 އަހަރަށް ވުރެ ގިނަ ދުވަހު ސަރުކާރުގައި މެދުނުކެނޑި ޚިދުމަތްކުރިއެވެ. ވަޒީފާ އަދާކުރަމުން ދިރިއުޅުމުގެ އެހެން ޒިންމާތައް އަދާކުރަމުން ވެސް ޝަމީމާ ގެ ހިތުގައި ޚާއްސަލޯތްބެއް ދެވިފައިވާ އުރުދޫބަސް ދަސްކުރުމުގެ މަސައްކަތް ކުރިއަށް ގެންދެވޭތޯ ބެލިއެވެ.

އެޒަމާނަކީ އުރުދޫ ބަހަށް ފަރިތަ ވަރަށް ގިނަ އިލްމްވެރިންތައް ތިއްބެވި ދުވަސް ވަރެއްކަމުން ޝަމީމާއަށް ލިބުނު ކޮންމެ ފުރުސަތެއްގައި މިދެންނެވި ބޭބޭފުޅުން އަރިހުން އުރުދޫ ބަސް އުނގެނުމުގައި ކުރިއަށް ދިޔައެވެ. ޝަމީމާ އުރުދޫބަސް އުނގެނުނު އެދުރުންގެ ތެރޭގައި އަލްއުސްތާޒު އިބްރާހިމް ޝިހާބު، އަލްފާޟިލް ބާޑީގޭ މުހަންމައިދީ އަދި އައްނަބީލާ ހަބީބާ ހުސެން ޙަބީބު ހިމެނެއެވެ. މީގެ ތެރެއިން ހަބީބާ ހުސެން ހަބީބު ގެ އަރިހުން އުރުދޫ ބަސް ދަސްކުރުމުގެ ވަރަށް މުހިންމު ބައެއްހިމެނެއެވެ. ހަބީބާއަކީ ވަރަށް ތުއްޕުޅު އިރުއްސުރެ ފުރާވަރުގެ އުމުރުފުޅަށް އަރަންދެން އިންޑިޔާގެ ހައިދަރުއާބާދު ގައި ކިޔަވާވިދާޅުވި ބޭފުޅެކެވެ. ވަރަށް ރީތިކޮށް ވަރަށް މޮޅަށް އުރުދޫ ދެނެވަޑައިގަންނަވާ ބޭފުޅެކެވެ. ޝަމީމާ އުރުދޫބަސް އުނގެނެން ކުރި މަސައްކަތުގެ އެންމެ މުހިންމު  ބާބަކީ ހަބީބާ އަރިހުން ދަރިވަރުވި ދަރިވަރުވުމެވެ. އުރުދޫބަހަށް އޮތްލޯބި ޝަމީމާއާއި ހަބީބާގެ މަރުދުވަހަށް އޮތް ގާތްކަމާއި ރަހުމަތްތެރި ކަމުގެ ބިންގާކަމަށް ވެގެންދިޔައެވެ. ހަބީބާ ހުސެން ހަބީބަކީ އުރުދޫބަހަށް ވަރަށް މޮޅު ފަރިތަ ބޭފުޅަކަށް ވާއިރު ދިވެހިބަހަށް ވެސް ވަރަށްމޮޅު އަދަބީ ލިއުންތައް ލިއުއްވުމުގެ ކުޅަދާނަކަން ލިބިވަޑައިގެން ހުންނެވި ބޭފުޅެކެވެ. ވުމާއިއެކު ދިވެހިބަހަށް ހަބީބާ އުރުދޫބަހުގެ ލިއުންތައް ތަރުޖަމާ ކުރައްވާ އުޅުއްވައެވެ. ޝަމީމާ ޔަޙްޔާ އަށް ތަރުޖަމާ ކުރުމުގެ ވިސްނުމާ ހިއްވަރު ލިބި އެކަމުގައި ކުރިއަށް ދިއުމުގެ ވަރަށް  ބޮޑު ކުރެޑިޓެއް ހަބީބާ ހުސެން ހަބީބަށް އަރުވަންޖެހެއެވެ.

ދުވަސްވަރަކީ ދިވެހިންގެ ވަރަށް ގިނަބަޔަކު ބޯޓު ދަތުރުކުރަން ގޮސް އުޅުނު ދުވަސްވަރެކެވެ. އެގޮތުގެ މަތިން ދިވެހިންއުޅޭ ބޯޓުފަހަރު ތަކުގައި ދިވެހިންނާއެކު ވަރަށްގިނަ ޕާކިސްތާނު މީހުންއުޅެއެވެ. ޒަމާނަކީ ޝަންމީ ކަޕޫރުމެން ރާޖު ކަޕޫރު މެންގެ ފިލްމްތަކުގެ ރަންޒަމާނެވެ. އޮލިމްޕަސްތިއޭޓަރުގެ ހިންދީފިލްމް ތަކުގެ ރަންޒަމާނެވެ. ބުނާނަމަ ބުނެވޭނީ އޭރު އަދި އިނގިރޭސި ބަހުން ވާހަކަ ދައްކަން ދިވެހިން އެހާފަރިތަވެގެން ނާންނަ ވާހަކައެކެވެ. ބަލާ ރީތި ހިންދީ ފިލްމްތަކާ އަޑުއަހާރީތި ހިންދީލަވަތައް އެއީ ދިވެހިންގެ އޭރުގެ އެންމެބޮޑު މުނިފޫހިފިލުވުމުގެ ވަސީލަތެވެ. ވުމާއިއެކު ފައިދޭ ފުރައިގެ ޒުވާނުންގެ މެދުގައިވެސް ހިންދީބަސް ވަރަށް ފަރިތައެވެ. ލިޔަން ކިޔަން ނޭނގުނަސް ވާހަކަ ދައްކާލަން ފުދޭވަރަކަށް އެނގޭ މީހުންތިބެއެވެ. ދަންނަވާލުން މުހިންމު ކަންނޭގެއެވެ. ވާހަކަ ދައްކާދެއްކުމުގައި އުރުދޫބަހާ ހިންދީބަހަކީ ދާދި އެއްގޮތް ދެބަހެވެ. ލިޔާލިއުން ތަފާތުކަމަށްވިއަސް މެއެވެ.

ބޯޓު ދަތުރުކުރަން ދާ ގްރޫޕުގައި ވެސް މީގެޒުވާނުންގިނައެވެ. މި މީހުންއުޅޭ ބޯޓުތަކުގައި އުޅޭ އިންޑިޔާ ޕާކިސްތާނު މީހުންނާ ވާހަކަ ދައްކާލާ އުޅުމަކީ ފަޙުރެކެވެ. މިހިން އުޅޭއުޅުމުގައި ބޯޓުފަހަރުތައް ޕާކިސްތާނަށް ބަނދަރުކޮށް ހަދައެވެ. އަދި ބޯޓުގައި އުޅޭ ދިވެހިން ޕާކިސްތާނަށް ފައިބާ ހަދައެވެ. ޝަމީމާ އުރުދޫބަހަށް ހުންނަ ޝައުގާ، އެބަސް ދަސްކުރަންކުރާ މަސައްކަތް އެނގޭ އޭނަގެ ތިމާގެ ދެތިންމީހަކު ރާއްޖެ އަންނަމުން ޝަމީމާ ކިޔާލަން އުރުދޫ ޑައިޖެސްޓް ތަކާ ނޮވެލް ތައް ގެނެސްދީހަދައެވެ.

އެގޮތުން ޝަމީމާ އަތުގައި އޭރު އުރުދޫ ބަހުގެ ވަރަށް ގިނަފޮތްތައް ހުރެއެވެ. ވަރަށް ގިނަބައެއް ގެ ޒިންމާ ނަގައިގެން އުޅެންޖެހިފައި ވުމާއިއެކު ކައިވެއްޏަށް ދެތިންއަހަރު ތެރޭގައި އާމްދަނީ ގެ އެންމެބޮޑު އެއް އެހީތެރިޔާ ކަމަށްވާ ބައްޕަ ނިޔާވިއެވެ. އަދި ދިރިއުޅުމާއިގެން ކުރިއަށް ދިއުމަށް އިތުރު އާމްދަނީ ހޯދުންވެސް އޮތީ ބޮޑުކަމަކަށް ވެފައެވެ. އެވަގުތު ދަސްވެފައި ހުރި ބަހުގެ ކުދި ވާހަކަ ފޮތްތަރުޖަމާ ކުރުމުގެ ވިސްނުން އައީއެވެ. ތަރުޖަމާކުރަން ފެށުމުގައި ، އަންނަބީލާ ހަބީބާ ހުސެންހަ ބީބުގެ އިތުރުން ދިވެހިބަހުގެ ފުންނާބުއުސް އުސްތާޒު އާމުލީގެ އަބްދްﷲ ސޯދިގުގެ އެހީތެރިކަމާއި ހިތްވަރު ވަރަށްބޮޑަށްލިބުނެވެ.

ވަރަށް ޖެހިލުންވެހުރެ ކުރެވިދާނެކަމެއްބާއޭ ހިތާހުރެ އުރުދޫފޮތް ދިވެހިބަހަށް ތަރުޖަމާ ކުރަން ފެށިފެށުމަކީ ޝަމީމާ ޔަޙްޔާ މުޅިރާއްޖެއަށް މަޝްހޫރުނަމެއްގެ ގޮތުގައި ތައާރަފުވެގެންދިއުމެވެ.

އެދުވަސްވަރަކީ އިނގިރޭސި އިނގޭމީހުން އިނގިރޭސި ބަހުންހުންނަ ވާހަކަތައް ކިޔާއުޅުނަސް އާއްމުކޮށް އިންގިރޭސި ނޭނގޭ މީހުންނަށް ކިޔާލާނެ ވާހަކަފޮތް އެއްޗެތި މާގިނަ ޒަމާނެއްނޫނޭ ދެންނެވިއަސް ދޮގަކަށް ނުވާނެއެވެ؛ މޫނިފޫހިފިލުވާލަން ވެސް ކިޔާލާނެ ވާހަކަފޮތްތައް ދިވެހިންގެ ތެރޭގައި އާއްމުނުވުމާއެކު ޝަމީމާ ތަރުޖަމާ ކުރަންފެށި ވާހަކަތަކަށް ދިވެހިންގެ ތެރޭގައި ވަރަށް މަޝްހޫރުވެ ވަރަށް ތަރުހީބު ލިބިގެން ދިޔައެވެ.

1980ގެ ކުރީކޮޅުގެ އަހަރުތަކުގައި އަމިއްލަ މަޖައްލާއެއް ރަޖިސްޓްރީކޮށް (ބާރު) އުރުދޫ ރީތިވާހަކަތައް ތަރުޖަމާކޮށް ޗާޕުކޮށްގެން ނެރެންފެށުމަކީ މުނިފޫހިފިލުވާލަން ވެސް ކިޔާލާނެ މާގިނައެއްޗެއް ނެތިފައި ތިބިބަޔަކަށް އައި އީދެއްފަދައެވެ. ޝަމީމާގެ ވާހަކަތައް ފުރަތަމަ ޗާޕުކޮށްނެރެންފެށީ މަހަކު އެއްފަހަރު ނެރޭ 8 ނުވަތަ 16 ވަރަކަށް ގަނޑުގެކުޑަފޮތެއްގެ ސިފައިގައެވެ. ފޮތްވިއްކަނީ ވަރަށް ކުޑަ ކުޑަައަގެއްގައެވެ. ހަދާންވާގޮތުގައި ދެރުފިޔާއެއްހާ ވަރަށެވެ. ޝަމީމާގެ ވާހަކަތައް މަގުބޫލު ވެގެންދިޔައީ ހަލުއިކަމާއެކުގައެވެ. ވާހަކަފޮތް ނިކުތުމުގެ އިންތިޒާރުގައި ވަރަށްގިނަބަޔަކު ތިބެނީ ކެތްމަދުވެފައެވެ. އޭރު އޮންނައުސޫލަކީ ގޭގައި އުޅޭ ގާތްތިމާގެ ފިރިހެން ކުދިން ފޮތްބަހަން ދިއުމެވެ. ފޮތްބޭނުންކަމަށް ނޯޓުކޮށްފައި ތިބޭ މީހުންނަށް މިހާރު މިއޮންނަ ޑެލިވަރީ ތައް ހަދަންދާގޮތަށް ފޮތަށް އޯޑަރުޖަހާފަ އޮންނަ ކޮންމެގެއަކަށް ގެންގޮސްދިނުމެވެ، ފޮތް ގެންގޮސްދިނީމާ ފޮތަށްވާ ލާރި ދޭނެއެވެ. ފޮތް ޑެލިވަރީ ކުރަން ތިބެނީ އެންމެ ނޫކަށިފުރައިގެ ޒުވާންފިރިހެން ކުދިންކޮޅެކެވެ. ޝަމީމާގެ ބެލެހެއްޓުންތެރިކަމުގަ ތިބޭ ދެބެންގެދެދަރި ހިސާބުގެ ތިމާގެ ކުދިންނެވެ. ވާހަކަ ކިޔާހިތުން ކެތްމަދުވެފަ  ތިބޭމީހުން ވާހަކަފޮތް ޑެލިވަރކުރަންދާ ކުދިންކޮޅަށްދެނީ  ”ރަތްދޫލައިގެ“ މެހެމާންދާރީއެވެ.  ފޮތް ގެންގޮސްދޭތީ ދެފުށުންފިރުމާ މީރުކާއެއްޗެހިދީ ވަރަށް ހޭހަންކުރާވާހަކަ އައިސް ހީހީފަދައްކާނެއެވެ.

ވާހަކަތައް ތަރުޖަމާ ކުރުމުގެ ކަންތައް ހިނގަމުން ދިޔައީވެސް ވަރަށް ފޯރިގަދަ މާހައުލެއްގައެވެ. ގޭގެ ހުރިހާ ތިމާގެ ކުދިންގެ ތުއްތައްތަ އަކީ 15 ވިއްސަކަށް ކުދިންބެލުމުގެ ޒިންމާ ނަގާ އެހުރިހާ ކުދިންގެ ދެވަނަ މަންމައެވެ. އިހުގެ ބޮޑުގޯއްޗެއްގައި ނިކަންބޮޑެތި 6ފޫޓު  7ފޫޓުގެ ބޮޑެތި ދެތިންމޭޒު ހާމަފެންޑާއެއްގައި ހުންނައިރު ރޭގަނޑުގެ ކެއުމުގެ ކަންތައް ނިމުނީމަ މޭޒުތައް ކައިރި ފަހަރަކު ކުއްޖަކު އިށީންދެ ތަރުޖަމާ ކުރަމުން ޖުމުލަތައް ދިވެހިބަހުން ކިޔައިދެމުންދާވަރަކަށް އަވަސްލިއުމަކުން ނޯޓު ކުރަމުންދާނެއެވެ. މިކުދިންތަކުގެ ތެރޭގައި ސަލީމްބެއާ އަދިވެސް ދެތިންކުއްޖަކު އެއީ އާދަޔާޚިލާފަށް ނޯޓުކުރުމުގެހުނަރުގެ އިތުރުން ބަހަށްވެސް މޮޅުކުދިންނެވެ. ޝަމީމާ ކިޔައިދޭއިރު އެކުދިން ފޫހިވުމެއްނެތި ލިޔަމުންދާނެއެވެ. ވާހަކައިގެ ދެންއޮތްބައި އޮލުންފިލުވައި، އެކަމުގެ ފަޙުރުހޯދަން ވެސް ނޯޓުކުރާކުދިންގެ ފޯރި ވަރަށްގަދައެވެ.

އެނޯޓުތައް ލިޔެވިފައިހުރީ ރަނގަޅަށްތޯ ބެލުމުގެ ބުރެއްވެސް ދާނެއެވެ. ދެން އެނޯޓުތައް ހަވާލުކުރާނީ ޗާޕުކުރުމަށްޓަކައި ސްޓެންސިލް ތައްޔާރުކުރާށެވެ. މީވަރަށް ކަވި ވަރަށް ވަގުތުނަގާ ކަމަކެވެ. ސްޓެންސިލްލިޔެގެން ޗާޕުކުރުން ހުއްޓާލުމާ ހަމައަށްވެސް ސްޓެންސިލް ލިޔެދިނުމުގައި އެންމެ މުހިންމު ރޯލެއްއަދާކުރައްވަނީ ސްޓެންސިލްލިއުމުގެ ފަންނުގައި މަޝްހޫރު ބ.އަތޮޅުއޭދަފުއްޓަަށް ނިސްބަތްވާ އަޒީއެވެ. އަޒީއަށް ޕިންކުއަޒީއޭ ވެސް ކިޔާއުޅެއެވެ. އަޒީ އަކީ ޝަމީމާގެ ވަރަށް ޒަމާންވީ ކޮލީގް (އެއްއޮފީހުގައި ވަޒީފާއަދާކުރާ) ބޭކަލެއް ވެސް މެއެވެ. ސިއްކަގޭ ހަސަންމަނިކުފާނަކީ ވެސް ވާހަކަތައް ތަރުޖަމާކުރަންފެށިތާ ކުރީކޮޅުއްސުރެ ސްޓެންސިލް ލިއުމާއި ޗާޕުކުރުމުގެ ކަންކަމުގައި ޝަމީމާއަށް ވަރަށް އެހީތެރިކަން ފޯރުކޮށް ދެއްވި ބޭކަލެކެވެ،

ވާހަކަފޮތްތައް ޗާޕުކުރުން ވެސް އެއީ ވަރަށް ”ބޮޑު“ އޮޕަރޭޝަންއެކެވެ. ދުވަސްވަރަކީ މިޒަމާނުގެ އިލެކްޓްރިކް އިލެކްޓްރޯނިކު ޗާޕުމެޝިންގެ ޒަމާނެއްނޫނެވެ. ޗާޕަކަށް ވާކަހަލަ ޗާޕެއްކުރަނީ ނޮވެލްޓީ އަލީހުސެންގެ ޗާޕުޚާނާގައެވެ. އެތަނަށް ޗާޕުކުރަން ގެންދިއައިމަ އަގުބޮޑެވެ. ވަގުތުނަގައެވެ. އަލީހުސޭންއަކީ ހަމައެކަނި އެމަސައްކަތްކުރައްވާ ފަރާތްކަމަށްވުމުން ސަރުކާރުގެ އެހެނިހެންމުހިންމު ޗާޕުތަކުގެ މުހިންމުކަން ވަރަށް ބޮޑެވެ. ޝަމީމާ އަށް އޭނާގެ ކުޑަވާހަކަ ކޮޅުތައް އޭގެ ”އެހެމް“ ވަގުތުގައި ކިއުންތެރިންނާ ހަމައަށް ފޯރުކޮށްދެވޭތޯ ބަލަން ޖެހެއެވެ. ކިއުންތެރިން ތިބެނީ ދެންއަންނަ ބައިގެ އިންތިޒާރުގައި ކެތްމަދުވެފައެވެ. ހައްލެއްކަމަށް ފެނުނީ އަމިއްލަ އަށް ޗާޕުކުރަން ފެށުމެވެ. ބުރަމަސައްކަތެކެވެ. ސްޓެންސިލް ލައްވައިގެން ދެލިފުޅިއަޅައިގެން އަތުންއަނބުރައިގެން ޗާޕުކުރަން ފެށިއެވެ. ހަމަގޭތެރޭގައި ގޭތެރޭގައި އުޅޭ ކުދި ގުްރޫޕްގެ އެއްބާރުލުމާއެކު ފޮތްތައް ޗާޕުވެގެން ނިކުމެއެވެ. ޗާޕުކުރުމާ ފޮތްއެޅުމާ ފޮތްތަކުގަ ހީރަސް ޖެހުމާ މިހުރިހާ ކަމެއްވެސް ހިންގާނީ އެއްކަލަ ފެންޑާގައި ހުންނަ ފިސާރިބޮޑެތި މޭޒު ތަކުގައެވެ. ނިކަންފޯރިއާ މަޖަލުގައެވެ. ތުއްތައްތަށް އެހީނުވާނެ އެއްވެސް ކުއްޖެއް ނޫޅޭނެއެވެ. އަތުންއަނބުރާ މެޝިންއަށް އެންމެ ފަރިތަވެފަ ކުޅަދާނަވާނީ ޝަމީމާގެ ދެބެންގެ ދެދަރި ހިސާބުގެ ތިމާގެ ކުއްޖެއްކަމަށްވާ ހަސަން ސަލީމު އާއި ޝަމީމާގެ ފަހަރިންކަމަށްވާ ބަދޫރާއާއި މުނީރާއެވެ. އެކަކުވެސް ހިލެއަކުނުލާނެއެވެ. އޭގެއިތުރުން ޝަމީމާގެ ވާހަކަތައްޗާޕުކުރުމުގެ މަސައްކަތް ތަކުގައި، އެހީތެރިވެދިން އެމީހެއްގެ ނަންކޮންމެހެންވެސް ފާހަގަކޮށްލުންމުހިންމު ފަރާތަކީ، ނޫސްނެރުމާއި ނޫސްވެރިކަމުގެ ރޮނގުގައިނަން މަޝްހޫރު މަނަދޫ އަބްދުއްސައްތާރެވެ. މަނަދޫ އަބްދުއްސައްތާރުގެ އެހީތެރިކަން ވެސް ފާހަގަ ކޮށްލުން މުހިންމެވެ. މަނަދޫސައްތާރަކީ ޝަމީމާއަށް ބޮޑުދައިތަކިޔާ ވަރަށްގާތްތިމާގެ ކުއްޖެއްގެ ފިރިކަލުން ވެސް މެއެވެ. ވުމާއިއެކު ސައްތާރުގެ ފަރާތުން ޝަމީމާގެ ވާހަކަތައް ޗާޕުކުރުމުގައި ލިބުނު އެހީތެރިކަމަކީ ގާތްތިމާގެ ކަމުގެ ގުޅުމުގެ ވަރަށް ރަނގަޅު މިސާލެއްކަމުގައި ދެންނެވިދާނެއެވެ.

ފޮތްތައް ހީރަސް ޖެހުމުގައި އެންމެ އަރާހުންނަނީ ޝަމީމާގެ ފިރިކަލުން މަންނާނުއެވެ. ހުރިހާކުދިންގެ ތުއްތައްތަބޭބެ، ނޫނީ ސިފައިންގެ ބޭބެއެވެ. ސިފައިންގެ ބޭބެކިޔަނީ މަންނާނުއަކީ ސިފައިންގެ ބޭކަލެއްވީމައެވެ. ނޮވެލްޓީން ކުރަންޖެހޭވަރަށް ގިނަ ކަންތައްވެސް ދާނީމަންނާނުގެ ބެލުމުގެ ދަށުންނެވެ.

ފޮތުގެ ބަނޑޭރިގަނޑުގެ ކަންތައް ވަރަށް މުހިންމެވެ. މާގިނަ ފޮޓޯތަކެއް ލިބޭކަށް ނުހުރެއެވެ. ކޮންމެވެސް ފިލްމްސްޓާރެއް ނުވަަތަ އެސްޓައިލް ގެ މީހެއްގެ ރީތި ފޮޓޯގަނޑެއް ލައިގެން ވާހަކަކިއުންތެރިން އަޅައިގަންނަ ކަހަލަ ގޮތަކަށް ބަނޑޭރިގަނޑު ހެދުމަކީ މުހިންމުކަމެކެެވެ. ފޮތްއަޅާ ހީރަސްޖަހާ ކަފާއެއްވަރުކޮށްފަ ދެން އެވީ ނޮވެލްޓީއަށް އަލީހުސޭން އަރިހަށް ބޭރުގަނޑު ހަދަންފޮނުވާށެވެ. ބަނޑޭރިގަނޑު ހަދައިދެވެން އޮންނަ އެންމެ ރަގަނޅު (ލުއި) އަގެއްގައި އަބަދުވެސް އަލީހުސެން ޝަމީމާގެ ވާހަކަފޮތްތަކުގެ ބަނޑޭރި ގަނޑުތައް ހައްދަވައިދެއްވައެވެ. ޗާޕުކުރަންބޭނުންކުރާ ދެލިފަދަ ތަކެތިވެސް ދެއްވެންއޮތް އެންމެ ހެޔޮއަގެއްގައި އަލީހުސޭނު ދެއްވައެވެ. ޝަމީމާޔަހްޔާގެ ވާހަކަތައް ކިޔާ އުޅުނު ކިއުންތެރިން އަލީހުސޭން އަށް ޝުކުރުވެރިވުންހައްގެވެ. ވާހަކަ ފޮތްތައް ޗާޕުވެގެން ކިއުންތެރިންނާ ހަމައަށް އައުމުގައި ނޮވެލްޓީ އަލީހުސެން ނޫނީ ވާރޭވިލާއަލީހުސޭންގެ ގެ ބައިވެރިވުންވަރަށް ބޮޑެވެ.

ޝަމީމާ ޔަޙްޔާގެ ވާހަކަތައް ތަރުޖަމާކުރުމުގެ ސިލްސިލާގައި ފަންސާހަކަށް ވާހަކަ ފޮތް ތަރުޖަމާކުރެވިގެން ކިއުންތެރިންނާ ހަމައަށް ފޯރާފައިވެއެވެ. ކޮންމެ ކަމަކަށްވެސް ނިމުންއަންނަ ފަދައިން ޝަމީމާ ޔަޙްޔާ ތަރުޖަމާތަކުގެ ރަންޒަމާން ބަދަލުވެގެންދިޔައީ ދިވެހިރާއްޖެއަށް ޑިސްއެންޓެނާ ތައާރަފުވެ ކަސައުޓީތައް އޭގެ ކުލަޔާރަހަޔާ ”ވަހާ“ އެކީ ރާއްޖޭގެ ގޭގެ ސިޓިންރޫމްތަކަށް ވާސިލްވި ހިސާބުންކަމަށް ބެލެވިދާނެއެެެވެ. ޗާޕުކުރުމުގެ ވައްޓަފާޅިތައް ބަދަލުވެ ޒަމާނީ އިލެކްޓްރޯނިކް ޗާޕު މެޝިންތަކުގެ ދައުރުއައިސް ފޮތް ޗާޕުުކުރުމުގެ އަގުތައް މައްޗަށް ދިއުމާއި އަތުންއަނބުރާ ޗާޕުމެޝިނަކުން ކުރާ ޗާޕުތައް ޒަމާނީޗާޕުތަކާ ތަފާތުވީވަރުން ވެސް ގޭގައި ކުރިން ކުރަމުންއައި ގޮތަށް ޗާޕުކުރުމުގެ ކަންތައް ހުއްޓާލަންޖެހުނު ޖެހުންވެސް އެއީ ލިބުނު ވަރަށްބޮޑު ހީނަރުވުމެކެވެ. ޗާޕުގެ އަގުބޮޑުވެ ފޮތްތައް ވިއްކަން ލިބޭ އަގުތައް ވެސް ވަރަށް ބޮޑަށް ބޮޑު ވެގެންދިޔައެވެ. އެކަމަކު މަސައްކަތުން ފޮތެއް ނެރެވިއްޖެނަމަ ހަމަ ވަރަށްހިނގައެވެ.

ވާހަކައިން މަންޒަރު ތަސައްވަރު ކުރުމުގެ ބަދަލުގައި ޓީވީތަކުން ހަމަލޮލަށް އޭގެ އެންމެ ފުރިހަމަ ކަމާއެކު ޑައިލޮގްތައް އަޑުއިވޭ ރީތި ޑްރާމާތައް ދިވެހިންނަށް ތައާރަފު ވެގެންދިއުމުން ފޮތަށް އޮތް ޝައުގު ނުވަތަ ކިޔަންއޮތް ޝައުގެ ކުޑަވުމަކީ ނުވެނުދާނެކަމެއް ނޫންތޯއެވެ.

އެކަމަކުވެސް ޝަމީމާ ޔަޙްޔާގެ ވާހަކަ ފޮތެއް ކިޔާލާ ހިތުން ކިޔާލަން ހޯދާ އުޅޭމީހުން ހަމައޭރުވެސް ގިނައެވެ. ޝަމީމާޔަހްޔާގެ ތަރުޖަމާތަކުގެ ތެރޭގައި ވަރަށް މަޝްހޫރުވެގެން ދިޔަ ހައެއްކައަށް ވުރެ ގިނަވާހަކަ އޮތެވެ. ކުރިން ނެރެވުނު ވާހަކަތައް އަލުން ޗާޕުކޮށްގެން ނުނެރެވުމުން ވެސް ވަރަށް ގިނަ ފޮތްތައް ލޯމަތިން ދުރަށްދިޔައެވެ. އެންމެ މަޝްހޫރު އެއްވާހަކަ އަކީ ”ޒަހަމް“ ގެނަމުގައި ތަރުޖަމާކޮށްފައި އޮތް ވާހަކައެވެ. ”ފަހަރި“ ވާހަކަވެސް ވަރަށް ހިނގިއެވެ. އޭރުގެ ޒުވާން އުމުރުފުރައިން މުސްކުޅިފުރައާއި ހަމައަށް މިދެވާހަކަ ކިޔާނުލާ ދިވެއްސަކު ޙާއްސަކޮށް ކަނބަލުން ގެ ތެރޭގައި ހަމަ ނޫޅޭނޭ ބުންޔަސް ދޮގަކަށް ނުވާނެކަންނޭގެއެވެ.

މިހާރުވެސް ”ޒަހަމް“ އާއި ”ފަހަރި“ އަށް އޮންނަ ތަރުހީބު ވަރަށް ބޮޑެވެ. ދިވެހިރާއްޖޭގެއަޑުން ކިޔާފަހުރި އެވާހަކަތަކުގެ އޯޑިއޯ އަދި ޕީޑީއެފް ފައިލް މިހާރު ވެސް ވަރަށް އާއްމުކޮށް ދައުރުވާތަން ފެނެއެވެ.

ޝަމީމާ ޔަޙްޔާ ވާހަކަތައް ތަރުޖަމާ ކުރުމުގެ އިތުރުން އޭރުގެ ރީތި ހިންދީފިލްތަކުގެ ހުލާސާ ދިވެހިން ތައްޔާރުކޮށްގެން ގެނެސްދިނުމާ އަދި ރީތިލަވަތައް ދިވެހިބަހަށް ގެނެސްދިނުމުގެ މަސައްކަތް ވެސް ކުރިއެވެ. މަޝްހޫރު ސްޓާސިނަމާ ގައި އެދުވަސްވަރު އަޅުވާ މަޝްހޫރު ފިލްމްތަކުގެ ހުލާސާތައް ދިވެހިބަހުން ގެނެސްދީފައިވެއެވެ.

ޝަމީމާ ޔަޙްޔާގެ ތަރުޖަމާތަކަށް ހާއްސަ ވެބްސައިޓެއް ތައްޔާރުކޮށް ޝަމީމާ ޔަޙްޔާ ތަރުޖަމާކުރި ވާހަކަތައް އެއްތަނަކުން ކިޔަންލިބޭގޮތް ހެދުމުގައި ވަރަށްގިނަ ސަބަބުތަކެއް އެބަހުއްޓެވެ. މިތަރުޖަމާތަކަކީ ޝަމީމާގެ ވަރަށް ބޮޑު ބުރަ މަސައްކަތެއްކަމުން ޝަމީމާގެ އާއިލާގެ އެއްވެސް މީހަކަށް އަންގާލުމެއްނެތި އެވާހަކަތަކުގެ އޯޑިއޯތަކާ ޕީޑީއެފް ފައިލް ކޮންމެ ކޮންމެ މީހަކު އަޕްލޯޑު ކުރުން ހުއްޓުވުމުގެ ގޮތުންނެވެ.

ޝަމީމާގެ ހަމަ ހުރިހާ ވާހަކަ ތަކަކީވެސް ދިވެހި ބަހުގެ ގަވައިދު ތަކާއި ހަމަަތަކަށް ފެތޭ ގޮތަށް ރީތި ދިވެހިބަހުން ހުރި ތަރުޖަމާތަކެއް ކަމަށް ވުމާއެކު އެވާހަކަތައް ރާއްޖެއާއި ރާއްޖޭން ބޭރުގައި ތިބޭ ދިވެހިން ކިޔާލަން ލިބޭގޮތްހެދުމަށެވެ. ވަރަށްގިނަ އިން މިގޮތަށް މިވާހަކަތައް ކިޔާލަން ލިބޭގޮތް ވާނެނަމައޭ ބުނެ އެޚިޔާލު ވަރަށް ގިނަބަޔަކު ފާޅުކުރާތީއެވެ.

މީހަކު ކޮށްފައި އޮތް ވަރަށް އުނދަގޫ ބޮޑު މަސައްކަތެއްގެ އަގުވަޒަންކޮށް މިވާހަކަތައް ކިޔާލަން ބޭނުންވާ ފަރާތްތަކަށް އެފުރުސަތު ހޯދައިދިނުމުގެ ގޮތުންނެވެ. ޝަމީމާގެ މި ބުރަ މަސައްކަތުގެ އަގު ވަޒަންކުރަން ޖެހޭނެކަމަށް ދެކޭތީއެވެ.

މިކަމަށް މިހާރު ވެސް މާ ލަސްވެއްޖެކަމަށް ގަބޫލުކުރަމެވެ. ޝަމީމާ ޔަޙްޔާ ނިޔާވިތާ މިހާރު 12 އަހަރުވީއެވެ. ޝަމިމާ ނިޔާވީ 16 ސެޕްޓެމްބަރ 2011 / 18ޝައްވާލް 1432 ވީހުކުރު ވިލޭރޭގެ ފަތިހުގެ ވަގުތުއެވެ. ހަމަ ހިނގާބިނގާވެ އުޅެނިކޮށް ކުއްލި ގޮތަކަށް ހަދަންޖެހުނު ބައިޕާސް ސަރޖަރީއެއް ހެދުމުގެ ތެރޭގައެވެ. އެއިރުއްސުރެ ފެށިގެން މިއަދާއި ހަމައަށް ވެސް ވެބްސައިޓް ހެދުމުގެ މަސައްކަތް އައީ ކުރެވެމުންނެވެ. ދެތިންފަހަރެއްގެ މަތިން ވެބްޕޭޖެއް ޑިޒައިން ކޮށް ޑޮމެއިން ގަނެވެސް ހެދިފައިވެއެވެ. ނަމަވެސް ކުރިއަކަށް ނުދިޔައެވެ، ސަބަބުތައް ގިނައެވެ.

މިފަހަރު އަނެއްކާވެސް މިބަލަނީ ޝަމީމާ ޔަޙްޔާގެ މިބުރަ އަގުހުރި މަސައްކަތް ތާރީހަށްޓަކައި ރައްކާ ކުރެވޭތޯއެވެ. މުނިފޫހިފިލުވާލަން މިފޮތްތައް ކިޔާލާހިތްވާ މީހުންނަށްޓަކައެވެ. ދިވެހިބަސް ފަރިތަކޮށްލަން ބޭނުންވާ ދިވެހި ޒުވާނުންނަށްޓަކައެވެ. ރާއްޖޭންބޭރުގައި އުމުރު ހޭދަކުރާ ދިވެހިންނަށްވެސް ކިޔާލަން ބޭނުންވީމައި ކިޔާލަން ލިބޭނެ ގޮތަށެވެ.

ތައާރަފެއްގެ ގޮތުގައި ފެށިފެށުން މާ ދިގު ވެސް ވެއްޖެކަންނޭގެއެވެ. ވާހަކައަކަށް ބަދަލުވާން ދާހެން ވެސް ހީވެއްޖެއެވެ. އެކަމަކުވެސް ޝަމީމާ ގެ ތަރުޖަމާ އާއި ގުޅިފައިވާ މި މުހިންމު ކަންތައްތައް މިޕޭޖަށް ވަންނަ ބޭފުޅުންނަށް އަދި ތާރީޚަށް ޓަކައިވެސް ނަކަލުކޮއްލުމަކީ ހަމަ މުހިންމުކަމެއް ކަމަށް ދެކި މިހާ ތަފްސީލްކޮށް ލިޔަން ބޭނުންވީއެވެ.