ޢަލީ ބިން ސުފިޔާނާއި ސުލްޠާން އައްޔޫބީ މަޝްވަރާ ކުރެއްވިތާ ތިން ރޭ ފަހެވެ. މުޅި ގާހިރާ އޮތީ އަދިރި ރޭގަޑެއްގެ އަރާމު އުގުގައި ނިދާފައެވެ. މިސުރުން ތައްޔާރުވެގެން އައި ގާހިރާގެ ހަގުރާމަވެރި ލަޝްކަރު އޭގެ އެއްދުވަސް ކުރިން ގާހިރާއިން ފައިބައިގެން ދަނިކޮށް ގާހިރާގެ އަހުލުވެރިންނަށް ފެނިފައިވެއެވެ. ގާހިރާގެ ރަށްބޭރުގައި ނީލަކޯރުގެ އައްސޭރީގައި އެ ލަޝްކަރުގެ މީހުން ފޭލިގަތައް ރުކުރުވާލިއެވެ. އޭގެ ތެރޭގައި ފިޔާދާއިންނާއި އަސްވާރުންވެސް ހިމެނެއެވެ. ރޭގަޑުގެ ފުރަތަމަދަން ވޭތުވެގެން ދަނިކޮށް ގަދަނިދި ނިދާފައިތިބި ގާހިރާގެ އަހުލުވެރިންނަށް ދުރުން ގިޔާމަތެއް ފަދަ އަޑުފަށްގަޑެއް އިވިގެން ހޭލެވުނެވެ. އޭރު ކަޑަބޮއްޖަހާފައި ދުވަމުން އަންނަ އަސްތަކުގެ ފިޔަވަޅުގެ އަޑުވެސް އިވިއިވި ހުއްޓެވެ. އެއަޑުފަށްގަޑު އިވިގެން ހޭލެވުނު މީހުން ފުރަތަމަ ހީކުރީ އެބައިމީހުންގެ ލަޝްކަރުގެ މީހުން ހަގުރާމައަށް ފަރިތަ ކުރަނީ ކަމުގައެވެ. ނަމަވެސް އެއަޑުފަށްގަޑު ގަދަވަމުން ކައިރިވަމުން އަންނަންފެށުމުން ރަށުގެ އަހުލުވެރީން ތަންމަތިތަކުން ތެދުވެގެން ގޮސް ފުރާޅު ފުރާޅަށާއި އުސްތަންތަނަށް އަރާ ބަލާލުމުން އުޑުމައްޗަށް މަރުގެ ރަތް ކުލައަރާފައިވާތީ ފެނުނެވެ. ދުރުން މާ ދުރުން ނީލަކޯރުގެ ތެރެއިން އަރައިގެންދާ ހުޅުގަޑުތަކެއް އާބާދީގެ އެކި ހިސާބަށް އޮހެމުންދާތީވެސް ބައެއް މީހުންނަށް ފެނުނެވެ. އެވަރުންވެސް ހަގުރާމައަށް ފަރިތަ ކުރަނީ ނޫންކަމާއި އެއީ ހަޤީޤީ ހަގުރާމައެއްކަމާއި އެހަގުރާމައިގެ ސަބަބުން ސޫދާނީ ލަޝްކަރުގެ ތެރެއިން ގިނަ އަދަދެއްގެ ބައަކު ދިރިތިއްބާ އަދައިގެން ދަނީކަމެއް ގާހިރާގެ އަހުލުވެރީންނަކަށް ނޭގެއެވެ.
އެއީ ސުލްޠާން ޞަލާޙުއްދީން އައްޔޫބީގެ ހިކުމަތްތެރި މޮޅު ރޭއްވެވުމެކެވެ. ދާރުލް ހަލޫމިއްޔާގައި ތިބި އެމަނިކުފާނުގެ ކުޑަ ލަޝްކަރު ނީލަކޯރުގެ އައްސޭރީގައި ހުންނަ ހިލަފަރުބަދަތަކުގެ މެދުގައި އޮންނަ ތަނަވަސް މައިދާނަށް ނެރުއްވާ އެހިލަ ބިމުގައި ފޭލިގެތައް ރުކުރުވާލެއްވެވިއެވެ. ދެން ޢަލީ ބިން ސުފިޔާން އެމަނިކުފާނުގެ ފަންނުގެ ބޭނުން ކުރެއްވިއެވެ. އެމަނިކުފަނުގެ ޖާސޫސުން ސޫދާނީ ލަޝްކަރުގެ ތެރެއަށް ފޮނުވައިގެން އެމީހުންގެ ހިތްތަކުގައި ބަޣާވާތުގެ އަލިފާންގަޑު ރޯކުރެއްވިއެވެ.
ސުލްޠާން އައްޔޫބީގެ ލަޝްކަރުގެ ސިފައިން ރޭގަޑު ނިދާފައި ތިއްބާ ސިއްރު ސިއްރުންގޮސް ހަމަލާ ދިނުމަށް ސޫދާނީ ލަޝްކަރުގެ ކޮމާންޑަރ ލައްވާ އެއްބަސް ކުރުވިއެވެ. އެގޮތަށް ހަމަލާދީ ސުލްޠާންގެ ލަޝްކަރުގެ ސިފައިންތައް މަރާ ހުސްކޮށްފާ އިރުއަރަންވާއިރަށް އެއްވެސް ބިރެއް ޖެހިލުމެއްނެތި ދާރުލް ހަލޫމިއްޔާއަށް ވެރިވެގަނެވިދާނޭ ކަމުގައި ޔަގީންކުރުވިއެވެ. – އެގޮތުން ސޫދާނީ ލަޝްކަރު ދެބައިކޮށްލާފައި އެއްބައި މީހުން ލަޝްކަރުގައި ބައިތިއްބާފައި އަނެއްބައިމީހުން ކަޑުމަގުން ފޮނުވައިގެން ރޫމުގެ ކަޑުގެ އައްސޭރީގައި ފޭލިގެޖަހައިގެން ތިބި މިސުރުގެ ސިފައިންނާއި ހަމަލާ ދީގެން ބަލިކޮށް ތަޅާ ހުސްކުރެވިދާނޭ ކަމަށް ޖާސޫސުން މެދުވެރި ކުރައްވައިގެން ސޫދާނީ ލަޝްކަރުގެ ކޮމާންޑަރުންނަށް ލަފާދެއްވައިގެން ސޫދާނީ ލަޝްކަރުގެ ބައަކު ވަރަށް ސިއްރުވެރި ގޮތެއްގައި ރޫމުގެކަޑުގެ އައްސޭރީގައި ހުރި މިސުރުގެ ސިފައިންގެ ސަލާމަތީ މަރުކަޒާއި ދިމާއަށް ފުރުވާލާނޭ ގޮތުން ރޭވުންތައް ރޭއްވެވިއެވެ. ކޮންމެއަކަސް ޢަލީ ބިން ސުފިޔާން ޖާސޫސުން ފޮނުއްވައިގެން ހަމަ ނުޖެހުން އުފައްދަވާ އެމަނިކުފާނު ރޭއްވެވި ރޭއްވެވުން ވަރަށް ފުރިހަމައަށް ކާމިޔާބު ކުރެއްވިއެވެ.
ސޫދާނީ ލަޝްކަރުގެ ކޮމާންޑަރުން އަވަސް އަވަހަށް ލަޝްކަރު ދެބައިކޮށްލާފައި އެއްބަޔަކު ކަނޑުމަގުން އަނެއް ބަޔަކު އެއްގަމު މަގުންގޮސް ނީލަކޯރުގެ އައްސޭރީގައި ފޭލިގެ ޖަހައިގެން ތިބި މިސުރުގެ ލަޝްކަރަށް ހަމަލާ ދިނެވެ. ސޫދާނީ ލަޝްކަރުގެ މީހުން މިކަންތައް ކުރީ ވަރަށް ސިއްރުންނެވެ. ރޭގަޑުގެ އަދިރީގައެވެ.
މޭލެއްގެ ދިގުމިނާއި ފުޅާމިނަށް ފެތުރިގެންވާ އެބޮޑު ލަޝްކަރު އެދިޔަގޮތަށް ގޮސް މިސުރުގެ ސިފައިންގެ ފޭލިގެތަކައި ދިމާކޮށް އިސާހިތަކު މުޅިތަނުގައި އެތުރިގެންފިއެވެ. ނަމަވެސް އެމީހުންނަށް އަތްފައި ހަރުވާނުލެވިގެން އުޅެނިކޮށް އަލިފާނުގެ ދުނިތަކާއި ތެލުން ތެންމައިގެން އަލިފާން ރޯކޮށްފައިހުރި ފޮތީގެ ގުޅަވަރުތަކެއް ވަރަށް ކުއްލި ގޮތެއްގައި އެމީހުންގެ މައްޗަށް އޮހެން ފަށައިފިއެވެ. ނީލަކޯރާއި ދިމާއިންވެސް އަލިފާނުގެ ގުޅަވަރުތަކެއް އަންނަން ފަށައިފިއެވެ. އިސާހިތަކު ފޭލިގެތަކުގައި އަލިފާން ރޯވެގެން އަދަންފަށައިފިއެވެ. އަރައިގެން ހުޅުގަޑު އުޑާއި ވާހަކަ ގޮވާހިސާބަށް އުފުލިގެން ހިގައްޖެއެވެ. ސުލްޠާންގެ ލަޝްކަރާއި ހަމަލާދޭން އަރައިގަތް ސޫދާނީ ލަޝްކަރުގެ މީހުންނަށް ހުސްފޭލިގެތަކެއް ފިޔަވައި އެހެން އެއްވެސް އެއްޗެއް ނުފެނުނެވެ. ސުލްޠާންގެ ލަޝްކަރުގެ ފޭލިގެތަކުން އިންސާނެއްގެ ހިލަން ހުވަށްވެސް އެމީހުނަކަށް ނުވިއެވެ. ސޫދާނީ ލަޝްކަރު ދިން ހަމަލާގެ ޖަވާބުދީ ހަގުރާމަ ކުރާނޭ އިންސާނަކު އެއިން ހިސާބެއްގައިވެސް ހުރިކަމަކަށް ނުވިއެވެ. – އެރޭގެ އިރާކޮޅު ސުލްޠާން އައްޔޫބީގެ ލަޝްކަރު ފޭލިގެތަކުން ނެރުއްވައިގެން ގެންދަވާ ފަރުބަދަތަކުގެ ނިވަލުގައި ބޭތިއްބެވުމަށްފަހު ހިކިހުޔާއި ވިނައާއި ހިކިފަތްތައް އަޅުއްވާ ފޭލިގެތައް ފުރާލައްވާފައި ހުރި ކަމެއް ސޫދާނީ ސިފައިންނަކަށް ނޭގެއެވެ. ފޭލިގެ ތަކުގެ އެތެރެ އަށާއި ބޭރަށް ތެޔޮ އަޅުއްވާ ރޯކޮށްލަން ތައްޔާރު ކުރައްވާފައި ހުރިކަމެއްވެސް ނުމެ އެގޭމެއެވެ. – އޭރުގެ ހަމަލާއަށްޓަކައި ސާޅަގަ ހަރުކޮށްފާހުރި ކުދިކުދި ކިޝްތީ ތަކެއްވެސް ސުލްޠާން ތައްޔާރު ކުރެއްވިއެވެ. އެރެއަށް އިރުއޮއްސުމާއެކު މިދެންނެވި ކިޝްތީތައް އެކި ދިމަދިމާއަށް ފުރުވާލެއްވިއެވެ.
މިސުރުގެ ލަޝްކަރުގެ ފޭލިގެތަކާއި ހަމައަށް ސޫދާނީ ލަޝްކަރު އައުމުން ފަރުބަދަތަކުގެ ތެރޭގައި ފިލާތިބި މިސުރުގެ ލަޝްކަރު އަލިފާނުގެ ތީރުތައް އުކަން ފަށައިފިއެވެ. އެއްކަލަ ކިޝްތީތަކުގައި ހަރުކޮށްފާހުރި ސާޅަގަތަކުގައި ލާފާ އެމަނިކުފާނުގެ ގުޅަވަރުތައް ފޮނުވަން ފަށައިފިއެވެ. ތެޔޮ އަޅާފައި ހުރި ހިކި ހުއި ފަތްތަކާއި ފޭލިގެތަކުގައި ހުޅުހިފުމާއެކު މުޅި މައިދާންއެކީ އެކައްޗަކަށް ނަރަކައިގެ މަންޒަރެއް ފަދައިން ފެންނަން ފަށައިފިއެވެ. ސޫދާނީ ލަޝްކަރުގެ އަސްވާރުން ސަވާރުވެގެން ތިބި އަސްތައް އެ ލަޝްކަރުގެ ފިޔާދާއިން ޗިސް ކުރަމުން ހިމުން ކުރަމުން ކޮޅުކޮޅަށް ދުވަން ފަށައިފިއެވެ. – ނަމަވެސް އެ އަލިފާނުގެ ތެރެއިން ނިކުންނާނޭ އެއްވެސް މަގެއް އެމީހުންނަކަށް ނުފެނުނެވެ. – ރުޅިއާއި ހަޅޭކުގެ އަޑު މެދުއުޑާއި ހަމައަށް އުފުލިގެން ހިގައްޖެއެވެ. ރޭގަޑުގެ އަދިރިކަން ދުވާލުގެ އަލިކަމަށް ބަދަލުކޮށްލާ ފަދަ ވަރުގަދަ ގޮތެއްގައި ރޯވެފައިވާ އަލިފާންގަޑުގެ ތެރޭގައި ސޫދާނީ ލަޝްކަރު ހައްޔަރުވެފައި ވަނިކޮށް ސުލްޠާން އައްޔޫބީގެ ކުޑަކުޑަ ލަޝްކަރުގެ މީހުން ފިލާތިބި ތަނުން ނިކުމެގެން އައިސް ސޫދާނި ލަޝްކަރު ވަށާލާފިއެވެ. އަލިފާންގަޑުގެ ތެރެއިން ސަލާމަތްވެގެން ނިކުމެއްޖެ ކޮންމެ މީހަކު ސުލްޠާން އައްޔޫބީގެ ލަޝްކަރުގެ ތީރުވެރިންގެ ދުނިތަކުގެ ޝިކާރު ކުރަން ފަށައިފިއެވެ. އޭގެތެރެއިން މަދު ބަޔަކު ފުރާނަ ސަލާމަތް ކޮށްގެން ފިލައިގެން ދިޔަކަމުގައި ވިއެވެ.
އަނެކޮޅުން ސުލްޠާން އައްޔޫބީގެ ލަޝްކަރުގެ ސަލާމަތީ މަރުކަޒުތަކަށް ހަމަލާ ދިނުމަށްޓަކައި އެއްގަމު މަގުން ދަތުރުކުރި ސޫދާނީ ލަޝްކަރުވެސް ރޫޅާލެއްވުމުގެ އިންތިޒާމްވެސް ސުލްޠާން އައްޔޫބީ ކުރައްވައިފައި ވެއެވެ. އެމީހުން ދަތުރުކުރި މަގުގައި ބަޔަކު މީހުން ފާރާއަށް ބައިތިއްބެވިއެވެ. ސޫދާނީ ލަޝްކަރު ފަސްދިނުމުން އެބައިމީހުން ނިކުމެ ލަޝްކަރުގެ ފަހަތުން އަރާ ކުއްލި ހަމަލާއެއް ދިނެވެ. ބަސްބުނާހާ ކުޑަ ކުޑަ ހިދުކޮޅެއްގެ ތެރޭގައި ލަޝްކަރު ހަލުވާލުމަށްފަހު ލަޝްކަރުގެ މީހުން ސަމާލުވުމުގެ ކުރިން އެބައިމީހުން ފިލާ ރައްކާވެއްޖެއެވެ. އިރުކޮޅެއްވެސް ނުވަނީސް އަނެއްކާވެސް ލަޝްކަރުގެ ފަހަތުން އައި، އަސްވާރުންގެ ބަޔަކު ހަމަ އެހާ ވަރުގަދަ ހަމަލާއެއް ދީފައި އެތަކެއް ގެއްލުމާއި ހަލާކު ދިނުމަށްފަހު ސަލާމަތުން އެބުރި ހިގައްޖެއެވެ. ދެބައި މީހުން އައިނައި ދިމާއެއް ނޭގި އައިސްފާ އަދިރީގެ ތެރެއަށް ގެއްލިގެން ހިގައްޖެއެވެ. – އެގޮތުން ފަތިސްވެ އަލިވާންވާ އިރަށް ތިންފަހަރެއްގެ މަތިން ސޫދާނީ ލަޝްކަރާއި ހަމަލާ ދިން ކަމުގައި ވިއެވެ. ނަތީޖާއެއްގެ ގޮތުން ސޫދާނީ ލަޝްކަރުގެ ހިތްވަރު އެލި ހަގުރާމަ ކުރުމަށް ޖެހިލުން ވާ ގޮތް ވެއްޖެއެވެ. އެކަހަލަ ގޮތަކަށް އެރޭގެ ރޭގަޑު ވެއަތުވެގެން ގޮސް އިރުއަރާ އަލިވުމުން ހުރިހާ ކޮމާންޑަރުން އެކުވެގެން ލަޝްކަރުގެ ހިތްވަރު އާލާކޮށްދީ ދެވަނަ ފަހަރަށް ލަޝްކަރު ސަމާލުކޮށްގެން ދަތުރުކުރަމުން ދަނިކޮށް ދެވަނަރޭ ވެސް އެމީހުންނަށް ޖެހުނީ ހަމަ އެކަހަލަ ހާލެކެވެ. ފަތުއަޑުކިޔާފާ އަދިރީގެ ތެރެއިން އަންނަ ދުނިތަކާއި ލަޝްކަރުގެ ފަހަތު ބައާއި ހަމަލާ ދީފާ ކަޑަބޮއްޖަހަމުން އެބުރިދާ އަސްތަކެއްގެ ފިޔަވަޅުގެ އަޑު ފިޔަވައި އެހެން އެއްވެސް ނިޝާނެއް އެމީހުންނަކަށް ނުފެނެއެވެ.
ލީންފައުދް އާއި ވިލިއަމް ފަދަ ޚާއްސަ މުއައްރިޚުން ލިއުއްވާފައިހުރި ލިއުންތަކުން އެގޭ ގޮތުގައި މީސްކޮޅު މަދު ކުޑަ ކުޑަ ލަޝްކަރެއް ފޮނުއްވައިގެން ދުޝްމަނުންގެ ބައިބޯ ލަޝްކަރުގެ ފަހަތުން ގޮސް ހަމަލާ ދީގެއްލުން ދިނުމަށްފަހު ސަލާމަތްކަމާއެކު ފިލާ ރައްކައުވުން އެއީ ސުލްޠާން އައްޔޫބީގެ ހިކްމަތްތެރި ރޭއްވެވުމެކެވެ. ހަގުރާމައިގެ އުކުޅެކެވެ. ސުލްޠާން އައްޔޫބީ އެގޮތުން ސޫދާނީ ލަޝްކަރުގެ ސިފައިން ކަންނެތް ކުރައްވާ ހިތްވަރު ދެރަކުރައްވަމުން ވަޑައިގެން ސޫދާނީ ލަޝްކަރު ބަލިކުރެއްވުމަށްޓަކައި ޚާއްސަ ގޮތެއްގައި އެމަނިކުފާނު ތައްޔާރު ކުރައްވާފައިވާ މައިދާނުގައި ހަގުރާމަ ކުރުމަށް އެމީހުންނަށް މަޖުބޫރު ކުރެއްވިއެވެ. – މިހަގުރާމައިގާ ސުލްޠާން އައްޔޫބީގެ ހިތްވަރަށް މުއައްރިޚުން ތައުރީފު ކުރައްވާފައިވެއެވެ. މުއައްރިޚުން ލިއުއްވާފައިވާ ގޮތުގައި މިޒަމާނުގެ ކޮމާންޑޯއާއި ގޮރިއްލާ އޮޕަރޭޝަން ވުޖޫދަށް އައުމުގެ އަސްލަކީވެސް ޞަލާހުއްދީން އައްޔޫބީއެވެ. އެބައިމީހުންވެސް ހަގުރާމަ ކުރަމުން ގެންދަނީ ޞަލާޙުއްދީން އައްޔޫބީ އެމަނިކުފާނުގެ ދުޝްމަނުންނާއި ހަގުރާމަ ކުރައްވާ ލަޝްކަރުތައް ވިއްސި ވިހާލި ކުރައްވާ ބަލި ކުރައްވަމުން ގެންދެވި ގޮތަކަށެވެ.
ސުލްޠާން އައްޔޫބީ ސޫދާނީންގެ އެބޮޑު ލަޝްކަރު ބަލި ކުރެއްވީ ހަގުރާމައިގެ ހިކްމަތްތެރި އުކުޅަކުންނެވެ. އެމަނިކުފާނު ރޭގަޑުގެ އަދިރީގައި ލަޝްކަރާއިގެން ވަޑައިގެން އެކި ފަހަރުމަތިން ހަމަލާ ދެއްވާ ސޫދާނީ ލަޝްކަރުގައި އުފެދިފައިވާ ހަގުރާމައިގެ ޖޯޝް ފިނިކޮށްލެއްވިއެވެ. އެބައިމީހުންގެ ލަޝްކަރުގައި މޮޅު ސިކުޑި އެއް އޮތް ލީޑަރަކު ނެތެވެ. ވުމާއެކު ސޫދާނީ ކޮމާންޑަރުންނަށް އެބައިމީހުންގެ ލަޝްކަރު ސަލާމަތެއް ނުކުރެވުނެވެ. އެ ލަޝްކަރުގައި އަލީ ބިން ސުފިޔާންގެ ޖާސޫސުންވެސް ތިއްބެވެ. އަރަބި ކަރައިން ބޮޑު ލަޝްކަރެއް އަންނަ ކަމުގެ ޚަބަރު ސޫދާނީ ލަޝްކަރުގެ ތެރޭގައި ފަތުރާ ސިފައިންގެ ހިތްވަރު ބަލިކުރުމަށް ޢަލީ ބިން ސުފިޔާންގެ ޖާސޫސުން ވާހަކަ ދައްކާ އުޅުނެވެ. – މިގޮތުން ސޫދާނީ ސިފައިން ބިރުގަންނަވައިގެން ހިތްވަރު ބަލިކޮށް ހަގުރާމައިގެ މައިދާނުން ފިލާ ރައްކައުވުމުގެ އެދުންވެރިކަން އެމީހުންގެ ހިތްތަކުގައި އުފެއްދުމުގައި ޖާސޫންސުން ވަރަށް ފުރިހަމަ ކާމިޔާބެއް ހާސިލް ކުރިއެވެ. އިސާހިތަކު ލަޝްކަރުގެ އިންތިޒާމް ގެއްލި ވިއްސި ވިހާލި ވެގެން ހިގައްޖެއެވެ. ނީލަކޯރުގެ އައްސޭރީއަށް އައި ސޫދާނީ ލަޝްކަރަށް އިބުރަތުން ފުރިފައިވާ ފަދަ ގެއްލުމާއި ހަލާކުލިބުނެވެ. …. ކޮންމެ އަކަސް އަރަބި ކަރައިން ލަޝްކަރެއް އަންނަ ކަމުގައި ޢަލީ ބިން ސުފިޔާންގެ ޖާސޫސުން ދެއްކިވާހަކައަކީ ދޮގު ވާހަކަ އަކަށް ނުވިއެވެ. – ލަޝްކަރުގެ އަދަދު މާގިނަކަމުގައި ނުވިއަސް ނޫރުއްދީން ޒަކީ އަރަބި ކަރައިން ލަޝްކަރެއް ފޮނުއްވެވިއެވެ. އެ ލަޝްކަރުގެ އަދަދަކީ ދެހާސް އަސްވާރުން ކަމުގައި ބައެއް މުއައްރިޚުން ލިއުއްވައެވެ. އަނެއްބައި މުއައްރިޚުން ނޫރުއްދީން ޒަކީ ފޮނުއްވިކަމަށް ލިއުއްވާފައިވަނީ ދެހާސް ފިޔާދާއިން ކަމުގައެވެ. އެ ލަޝްކަރުގެ އަދަދު ތަފާތުވިނަމަވެސް ޞަލާހުއްދީން އައްޔޫބީއަށް ހަގުރާމައިގެ އެހީ ލިބިވަޑައިގެންކަމުގައި ހުރިހާ މުއައްރިޚުންވެސް އެއްބަސްވެ ވަޑައިގަންނަވައެވެ. ފަންސާސްހާސް ސިފައިން އެކުލެވޭ ސޫދާނީ ލަޝްކަރަށް ޞަލާޙުއްދީން އައްޔޫބީ ދެއްވި އަލިފާނުގެ ހަމަލާގެ ސަބަބުން ވިއްސިވިހާލިވެގެންގޮސް ބައިބައިވެފައި ވަނިކޮށް ނޫރުއްދީން ޒަކީ ފޮނުއްވި ލަޝްކަރަކީ ޞަލާހުއްދީން އައްޔޫބީއަށް ލިބިވަޑައިގެންނެވި ވަރަށް ބޮޑު އެހީއެއް ކަމުގައި ވިއެވެ. އަވަސް އަވަހަށް ދެބައި ލަޝްކަރު އެއްކޮށްލައްވައިގެން މައިދާނުން ފިލަން ދުވާ ސޫދާނީ ލަޝްކަރާއި ދިމާކޮށްލެއްވިއެވެ.
ސުލްޠާން އައްޔޫބީއަށް ލިބިވަޑައިގެންނެވި އެހީފުޅާއި އެމަނިކުފާނުގެ އަމިއްލަފުޅު ލަޝްކަރާ އެއްކޮށްލައްވައިގެން ސޫދާނީ ލަޝްކަރާއި ހަމަލާ ދެއްވާ ގަތުލު ޢާމެއް ހިންގަވާލުމަކީ މާ އުދަގޫފުޅު ކަމަކަށް ނުވިއެވެ. ނަމަވެސް އެމަނިކުފާނު އެފަދަ އަމަލެއް ނުކުރައްވަވައެވެ. – ވެރިކަމުގެ ސިޔާސަތު ކުރިއަށް ނެރުއްވިއެވެ. – ސޫދާނީ ލަޝްކަރުގެ ކޮމާންޑަރުން ހައްޔަރު ކުރައްވާ އެމަނިކުފާނާއި ދެކޮޅު ހަދާފިނަމަ ގެއްލުމާއި ހަލާކު ފިޔަވައި އެހެން ގޮތެއް ނޯންނާނެ ކަން އެންގެވިއެވެ. – މިހެން އެންގެވި ނަމަވެސް އެމަނިކުފަނު އެއިން އެއްވެސް މީހަކަށް ގެއްލުމެއް ނުދެއްވައެވެ. އެމީހުންނަށް މަޢާފް ކުރައްވަވާފައި ދޫކޮށްލެއްވުމަށް ފަހުގައި ލަޝްކަރުގެ އާދައިގެ ސިފައިން ވަޒީފާއިން ވަކިކުރައްވާ ދަނޑުވެރިންނަށް ހެއްދެވިއެވެ. – އެއެންމެންނަށް ބިން ދެއްވިއެވެ. ދަނޑުވެރިކަން ކުރުމަށްޓަކައި ސަރުކާރުން އެހީ ދެއްވިއެވެ. – ހުރިހާ ކަމެއް މިގޮތަށް ހަމަޖައްސަވާފައި އޭގެ ތެރެއިން ބޭނުން މީހަކަށް ސިފައިންގެ ވަޒީފާ ލިބިދާނޭ ކަންވެސް އެންގެވިއެވެ.
ސޫދާނީ ލަޝްކަރުގެ ކަންތައް ނުހަނު ބުއްދިވެރިކަމާއެކު ހަމަޖެއްސެވުމަށްފަހުގައި ނޫރުއްދީން ޒަކީ އެހީ ފުޅެއްގެ ގޮތުން ސުލްޠާން އައްޔޫބީއަށް ފޮނުއްވި ލަޝްކަރާއި އެމަނިކުފާނުގެ އަމިއްލަފުޅު ލަޝްކަރެއް ލަޝްކަރަކަށް ހައްދަވައިގެން ސޫދާނީ ސިފައިންގެ ތެރެއިންވެސް ވަފާތެރި ކަމަށް ފެނިވަޑައިގެންނެވި ބަޔަކު އެ ލަޝްކަރުގައި ބައިވެރި ކުރައްވާ ޚާއްސަ ލަޝްކަރެއް ތައްޔާރު ކުރެއްވިއެވެ. – އެހުރިހާ ކަމަކުން އަވަދިވެވަޑައިގެން ޞަލީބީންނާއި ހަމަލާ ދެއްވުމުގެ ރޭވުންތައް ރާއްވަވަން ފެއްޓެވިއެވެ. ޖާސޫސުންނާއި ތީރުވެރިންގެ ޖަމާއަތެއް އަވަހަށް ތައްޔާރު ކުރެއްވުމަށް ޢަލީ ބިން ސުފިޔާންއަށް އެންގެވިއެވެ. – އަނެއްކޮޅުން ޞަލީބީންވެސް ޖާސޫސު ކުރުމާއި ޚަބަރު ހޯދުމުގެ އިންތިޒާމުތަކުގެ ބާރު ގަދަ ކުރަންފެށިއެވެ.
