ދުރުން ބަލައިލާއިރު ޙަވޭލީ ފެންނަނީ އަލަތު އަންބަކު ނަލަހައްދާ ޖަރީކޮށްފައިވާ ހެދެމެއް ހެންނެވެ. ފެހިކުލަ، ނޫކުލަ، ރީދޫ ކުލަ، ރަތްކުލަ، ފިޔާތޮށި ކުލައިގެ ދިދަފަތިތަކެވެ. ހަމަ އެކުލަތަކުގެ ނިވިދިއްލޭ ކުލަބޮކިތަކެވެ. ކުދިކުދި ކުލަބޮކިތަކުން އެކުލަވާލާފައިވާ ބޮކިފަތިތަކެވެ. މިބޮކިފަތިތައް ފާރުގެ ކުލަ ނުފެންނަވަރަށް ކައިރި ކައިރީގައި ދަމާލާފައި ހުރިއިރު ހީވަނީ މުޅި ހިސާބު ހުޅުދާން ކޮށްފައިވާހެންނެވެ. ކުރިއްސުރެވެސް އެ ޙަވޭލީއަކީ ތަނުގެ ހައިބަތުކަމާއި ޤަދަރުވެރިކަމުގެ ފަޚުރު ޙާސިލުވެފައިވާ ތަނެކެވެ. އަމުދުން މިހާރު ދިއްލާ އަޅާލީމާ އެތައް ހިސާބެއްގެ ޙަވޭލީ ބަލަން މީހުންތައް އެއްވާން ފެށިއެވެ. ހަމައެކަނި ބެރަށް ފެންނަ ހިސާބެއް ނޫނެވެ. ޙަވޭލީގައި ނުދިއްލާ އެންމެ ތަންކޮޅެއްވެސް ނެތެވެ. ގަސްގަހާގެއްސެވެ. ވިނަތަކެވެ. ދޮރުތަކާއި ދޮރުފަތްތެކެވެ. މިހެންގޮސް ޙަވޭލީގައި ހަރަކާތްތެރިވާ މީހުންގެ ގައިގާވެސް ދިއްލާފާ ހުރިހެން ހީވެއެވެ. ޚާއްޞަކޮށް ރަސްމިއްޔާތު އޮންނަ ބޮޑުހޯލު ފެންނަ މީހަކު ޙައިރާންވެ އަންތަރީސްވާހާވެއެވެ. އެއީ ދުނިޔެމަތީގެ ކަމެއްބާވެއޭ ހީވެއެވެ. ފަރުޖާދު އެތަކެއް މަސްދުވަސް ވަންދެން ކަރުނައާއި ދާ އޮހޮރުވައިގެން ކުރި މަސައްކަތަށް ކިތަންމެ ވަރަކަށް ތަޢުރީފް ކުރިޔަސް ކޮޅުންލާކަށް ނެތެވެ. އެހާވެސް ރީތިވެފައި ފުރިހަމައެވެ……. ދުރުދުރަށް ދަންދެން ފެތުރިފައިވާ ކުލަތަކުގެ އިތުރުން މުޅިހިސާބަށް މީރުވަސް ފެތުރިފައިވެއެވެ. ނުމޫސުމުގެ މާ އެހާގިނައިން ހޯދާފައި ވަނީ ކޮންތާކުން ކަމެއްވެސް ނޭގެއެވެ.
މެހްމާނުންގެ އަޑު މުޅިހޯލް ގުގުމާފައިވެއެވެ. ވާހަކަ ދެއްކުމާ ހީ ސަމާސާ ކުރުމުގެ ސިލްސިލާއެއް އެތަނުގައި ފެތުރިފައިވެއެވެ. ޢާލީ ނޫރު މުޙައްމަދު ދުނިޔޭގައި ހުންނަވައިގެން ފަރުޖާދުގެ ކައިވެނި ކޮށްދެއްވި ނަމަވެސް އެހާގިނަ މީހުން އެޙަވޭލީއަކަށް ޖަމާއެއް ނުވީހެވެ. ދެކެފަރިތަ ރަށްޓެހިންގެ ތެރެއިންވެސް އެޕާޓީއަށް ދަޢުވަތު ނުދޭ މީހަކު ނުހުންނާނޭކަން ޔަޤީނެވެ. އެންމެންވެސް ތަޢްރީފް ކުރަނީ ފަރުޖާދަށެވެ. ޙަވޭލީގެ ތާރީޚުގައި އެފަދަ ދުވަހެއް ނާންނަ ކަމުގައި އެމީހުން ބުނެއެވެ. ވާނީވެސް އެހެންތާއެވެ. ފަރުޖާދުގެ ފައިސާތައް ފެންފަދައިން ޚަރަދު ކުރިއެވެ. ރޭދުވާ އެއްކޮށްގެން މަސައްކަތް ކުރިއެވެ.
”ފަރުޖާދަށް ލިބިފައިވަނީ ކިހާ ދީލަތި ހިތެއް ހެއްޔެވެ؟“ ހޯލްތެރޭގައި މިކަހަލަ ވާހަކަތަކެއްވެސް ދެކެވެމުންދެއެވެ.
”ގާތްކަމާއި އެކުވެރިކަމަކީ އެއީއެވެ.“ އެކަކު ބުންޏެވެ.
”އެއްވެސް މީހަކާ ދޭތެރޭގައި އެވަރުން އުޅޭކަށް ނުވާނެއެވެ.“ ކުރިން ވާހަކަ ދެއްކި މީހާއާ ޖެހިގެން އިން މީހާ ބުންޏެވެ.
”އެކަކުވެސް އިޙްސާންތެރިކަން ހަދާންކުރޭ ހެއްޔެވެ؟“ އެމީހުންގެ ވާހަކަ އަޑުއަހަށް ހުރި އެހެން މީހަކު ބުންޏެވެ.
”އެއީ މާތް އިންސާނެކެވެ. އެކަހަލަ މީހުން ދުނިޔޭގައި ވަރަށް މަދުވާނެއެވެ.“ އެންމެ ކުރިން ވާހަކަދެއްކި މީހާ ބުންޏެވެ.
އެންމެންވެސް މަރުޙަބާގެ ބުއިންތައް ބޮމުން މިކަހަލަ ވާހަކަތައް ދައްކަމުން ގެންދިޔައިރު ފަރުޖާދު ހަލާކުވެފައިވާ ހިތަކާއެކު އެވާހަކަތައް އަޑުއަހަން ހުއްޓެވެ. އެ ތަޢުރީފުގެ ބަސްތަކަކުން އޭނާއަކަށް އުފަލެއް ހިތްހަމަޖެހުމެއް ނުލިބެއެވެ. ވާނީވެސް އެހެންތާއެވެ. އޭނާގެ ޒަމީރު އޭނާގެ ދެފުށް ދެގޮތްކަން އިޙްސާސްކޮށްދެއެވެ. އެހާ ފުރިހަމަ އިންތިޒާމުތަކެއް އޭނާ ކޮށްދީފައި އެވަނީ އޭނާގެ އަޚު ޢާޞިފަށް ނޫންކަމާއި އެއީ އޭނާގެ އަތުން ބީވެގެން ދިޔަ ލޯތްބަށްޓަކައި ވެފައިވާ ޤުރުބާނީއަކާއި ހޭދައެއްކަންވެސް އޭނާގެ ޒަމީރު އޭނާއަށް ހަދާންކޮށްދެއެވެ…… ގުލްބާނޫއަކީ އެންމެ ފުރަތަމަ އަދި އެންމެ ފަހުގެ ލޯތެބޭ ޢާޞިފް ބުނިފަހުން ގުލްބާނޫދެކެ އޭނާވާ ލޯބި އިތުރުވާން ފެށިއެވެ. ހީވީ ލޯބީގައި ފިޔަފަޅައިގެން ހިތުތެރޭގައި އުދުހެން ފެށިހެންނެވެ. އެލޯބި ހިތާއި ސިކުނޑިންނެރެ އެއްލައިލަން މަސައްކަތްކުރި ވަރަކަށް ފެތުރި ބޮޑުވަމުންދިޔައެވެ. އޭނާގެ އިޚްތިޔާރުން ބޭރުވެ ބާރުކެނޑެމުން ދިޔައެވެ.
ހޯލުގެ އިރުމަތީ ފަރާތުގެ އެންމެ ފުރަތަމަ ސްޓޭޖަށް ބަލައިލާއިރު ފެންނަނީ ހުސް ރަތް ކުލައެވެ. އެތަނުގައި ޙަވޭލީގެ ހުރިހާ އަންހެނުންނާއި މެހްމާނުންގެ ތެރެއިން ޚާއްސަ އަންހެނުންގެ މެދުގައި އެއިނީ ގުލްބާނޫއެވެ. ރަތް ފަށުވި ފޮތީގައި ޖަރީކޮށްފައިވާ ހެދުމެއް އަޅައިގެން ރަނުގެ ގަހަނާތަކުން ހަތަރެސްފަޔާއި ކަރު ފުރާލައިގެން އެއިނީ ދުނިޔެމަތީގެ މަޚްލޫގެކޭ ނުބުނެވޭނެއެވެ. އެހާވެސް ރީއްޗެވެ. ޖެހިގެންހުރި މަސަންދެއްގައި ޢާޞިފް ހީލަހީލާ އިނެވެ. އެހެން އިނދެގެން އިރުއިރުކޮޅާ ގުލްބާނޫއާ ދިމާއަށް ބަލައިލައެވެ. ކޮންމެއަކަސް އޭނާގެ ނަޒަރުގެ ބީހުން އިޙްސާސްވާ ކޮންމެފަހަރަކު ގުލްބާނޫ ލަދުން ބޮނޑިވެލައެވެ.
ކެއުމަށްފަހުގައި މިޔުޒިކާއި ނެށުމުގެ ޕްރޮގްރާމްތައް ރޭވިފައިވެއެވެ. ޝަހަރުގެ އެންމެމަތީ ފަންތީގެ މިޔުޒިކް ގްރޫޕްތަކާއި ނެށުންތެރިންނަށް ދަޢުވަތު ދެވިފައިވެއެވެ. މިހާރު އެ ފަންނާނުންގެ ސިހުރު މުޅިތަނަށް ވެރިކުރުވަން ފަށައިފިއެވެ. ހުރިހާ މެހްމާނުން އެއްއަޑަކުން އެމީހުންނަށް ސާބަސްދީ އަތްތިލަބަޑި ޖަހަމުންދެއެވެ. މޮޅު ފަންނާނުންގެ ސިހުރު ބެލުންތެރިންގެ ހިތްތަކަށާއި ސިކުނޑިތަކަށް ފޯރުކޮށްފައިވެއެވެ. ގާތްގަނޑަކަށް އެއްގަޑިބައި އެހާކަށްހާއިރު ޘަމީން ޗައުދަރީ ޙާމިދު ބޭލާގެ ރީތި ލަވައަކަށް ނަށަން ފެށިއެވެ. މިޔުޒިކްގެ ހަމައަށް ޘަމީނާ ކޮށްލި ފަރި ޙަރަކާތްތަކަކާއި ލައްވާލި ބަނޑިތަކެއްގެ އަސަރުގަދަ ކަމުން އެންމެން ޙައިރާންކޮށްލިއެވެ. ޘަމީނާއަކީ އެ ފަންނުގައި މަތީ ވަނައެއް ޙާސިލްކޮށްފައިވާ އަންހެނެކެވެ. ފަރުޖާދުވެސް އޭނާގެ ނެށުން ބަލަން ގޮނޑިއެއްގައި އިށީނދެ ހަމަޖެހިލައިގެން އިނެވެ. މިޔުޒިކާއި ނެށުމާއި ލަވަ ކިޔުމަކީ އުފަލާއި ހިތްހަމަޖެހުމަށްޓަކައި ރަނގަޅު ކުޅިވަރެކެވެ. ފަރުޖާދުގެ ހިތަށް އެރިއެވެ. ކޮންމެއަކަސް ޙާމިދުބޭލާގެ ރީތި އަޑުން ލަވައަކަށްފަހު ލަވައެއް ކިޔަމުން ގޮސް އެފެށި ލަވައަކީ ފަރުޖާދުގެ ހާލު ދަންނަ މީހަކު އޭނާއަށް ރައްދުކޮށް ހަދާފައިވާ ލަވައެއް ކަމުގައި ހީވިއެވެ. އެލަވައިގެ ފަށުވި ޢިބާރާތްތައް އޭނާގެ ރޫޙު ތޮރުފާލިއެވެ. މުޅި މީހާ ތުރުތުރު އަޅަން ފެށިއެވެ. ދެލޯ ފެންކަޅިވިއެވެ. ބޭއިޚްތިޔާރުގައި ސްޓޭޖާ ދިމާއަށް ބަލައިލެވުނެވެ. އޭރު އާސިފެއް ގުލްބާނޫއެއް އެތާކު ނެތެވެ. އެމީހުން ވަށާލައިގެން ތިބި އަންހެނުންތަކެއްވެސް ނެތެވެ. ވަށައިގެން ނަޒަރު ހިންގާލިއެވެ. އެއްވެސް ތާކުން އެއިން މީހަކު ފެންނަން ނެތުމުން އޭނާގެ ގާތުގައި އިން ޠޯލިއާ ކުރެން އަހާލިއެވެ.
”ޠޯލިއާ ދައްތާއެވެ. ޢާޞިފްމެން ކޮބައިހެއްޔެވެ؟“ ފަރުޖާދު މިސުވާލު ކުރުމުން އޭނާގެ ސާދާކަމާ ހެދި ޠޯލިޢާގެ ގާތަށް ހިނިއައެވެ. ޖެހިގެން އިން ޒުލޭޚާ އުޅަބޮށިން ޠޯލިއާގެ ގައިގާ ޖަހާލާފާ ލޮލުން ލާނެތް އިޝާރާތެއް ކޮށްލިއެވެ. ދެން އަނެއްކާވެސް ދެމީހުން އެކުގައި ހީގެންފިއެވެ. އެވަރުންވެސް ފަރުޖާދަކަށް އެއްޗެއް ނުވިސްނުނެވެ.
”އެމީހުންގެ ކޮޓަރިއަށް އެމީހުން ހިނގައްޖެއެވެ. މިއީ ކުޅިވަރާއި މަޖަލުގައި ބޭކާރު ކުރަންވީ ރެއެއް ނޫނެވެ.“ ޒުލޭޚާ މިހެން ބުނެފައި ހީގެންފިއެވެ. އެވަގުތު ގަނޑުފެނުގެ ފިނިކަން ފަރުޖާދަށް އިޙްސާސް ކުރެވުނެވެ. ފަރުބަދައެއްގެ ކުރިން ވެއްޓުމުން އައިހެން ހީވިއެވެ. ކުއްލިއަކަށް އެވީގޮތެއް އެއްގޮތަކަށްވެސް އޭނާއަކަށް ނުވިސްނުނެވެ. ނެށުމާއި ލަވަކިޔުމުގެ ފޯރި އިންތިހާއަށް ގޮސްފައިވެއެވެ. މެންދަމުން އަލިވެއްޖެއެވެ. ވަގުތު ފާއިތުވަމުންދެއެވެ……. ފަރުޖާދަށް ވާނުވާގޮތެއް ނޭގެއެވެ. ނަށާތަނެއް ނުފެނެއެވެ. ލަވަކިޔާ އަޑެއް ނުއިވެއެވެ. މިޔިޒިކް ކުޅޭކަމެއް އިޙްސާސެއް ނުވެއެވެ. ހުރިހާ ގާތްކަމެއް ކެނޑިއްޖެއެވެ. ހުރިހާ ގުޅުމެއް ފުނޑުފުނޑުވެއްޖެއެވެ. ހިތްކުދިކުދިވެ ވިސްވިހާލިވެގެން ހިނގައްޖެއެވެ. ދެން ހަދާނެގޮތެއް ނެތިއްޖެއެވެ…… އެންމެފަހުން ކެތްނުކުރެވިގެން ފަރުޖާދު ތެދުވެގެން ކޮޓަރިއަށް ހިނގައްޖެއެވެ.
ފަރުޖާދު ކެތްތެރިކަމެއް ނެތި ކޮޓަރިތެރޭގައި ދެކޮޅަށް ހިނގަމުންދެއެވެ. އިރުއިރުކޮޅާ އަލަތު ދެމަފިރިންގެ ކޮޓަރިއާ ދިމައަށް ބަލައިލިއެވެ. ދެތިން ފަހަރަކު ފެންޑާގެ ތެރެއަށްވެސް ނިކުމެއްޖެއެވެ. ޢާޞިފްމެންގެ ކޮޓަރީގެ ފެންލައިޓްތަކުންނާއި ދޮރުތަކުގައި ދަމާފައިހުރި ފަރުދާތަކުގެ ތެރެއިން ފުރޭނިގެން ފެންޑާގެ ތެރެއަށް އެޅިފައިވާ ރަތް އައްޔަށް ނަޒަރު ހުއްޓާލައިފިއެވެ. ޔަޤީނެވެ. ޢާޞިފާއި ގުލްބާނޫ މިހަރު ތިބޭނީ އެކުވެ އެކަތިގަނޑަކަށްވެފައެވެ. ގުޅިލާމެހިފައެވެ. ފަރުޖާދު ބިރުވެރި ނަޒަރަކުން މުލައްދަނޑިއަށް ބަލައިލިއެވެ. އޭނާގެ މުލައްދަނޑީގެ ޙިޞޯރުގައި އެއްވެސް އެއްޗެއް ނެތެވެ. އިންސާނެއް ކީއްކުރަން ހެއްޔެވެ؟ ހިޔަންޏެއްވެސް ނެތެވެ. އޭނާ ދެއަތް ފަތުރާލާފައި ދެއަތް ބަލައިލިއެވެ. އެވަގުތު ކުއްލިއަކަށް އޭނާއަށް އެވީގޮތަކުން ދުވެފައިގޮސް ކޮޓަރިއަށް ވަދެއްޖެއެވެ….. އެރީތި ހިތްފަސޭހަ ކޮޓަރިވެސް މިހާރު އޭނާއަށް ހީވަނީ ދުވަސްވެ ވީރާނާވެފައިވާ މަހާނައެއް ހެންނެވެ. އޭނާ ވަނުމާއެކު ފާރުތައް ކައިރިވަމުން އައިސް އޭނާ ފިއްތާހެންވެސް ހީވިއެވެ.
”ގުލްބާނޫ……. ގުލް……ބާނޫ………….“ އޭނާގެ ހިއްސުތަކާއި އޭނާގެ ނާރުތަކާއި އޭނާގެ ހަށިގަނޑުގައި ހިނގާ ލޭގެ ހުރިހާ ފޮދުވަރުތަކެއް އެއްފަހަރާ އެއް އަޑަކުން ގޮވާލިއެވެ. އެވަގުތު އޭނާއަށް ތެޅިގަނެވުނެވެ. އެނދުމައްޗަށް ވެއްޓިގަނެވުނެވެ. އެގޮތަށް އަމިއްލައަށް ކިތަންމެ އަނިޔާއެއް ކުރިޔަސް އޭނާގެ ހިތަކަށް ހަމަޖެހުމެއް ނުލިބޭނެއެވެ. އޭނާގެ ލޯބި އެހެން މީހެއްގެ އުރުތެރޭގައި ފިތި ހަފުސްވެއްޖެއެވެ. އޭނާގެ ހިތް ކުދިކުދިވެ ވިސްވިހާލި ވެއްޖެއެވެ……. ސިކުނޑި ގަނޑުވެ އެކަތިގަނޑަކަށް ވެއްޖެއެވެ……….
އެރޭ އެއްގޮތަކަށްވެސް އޭނާއަކަށް ނުނިދުނެވެ. ނިދޭނީވެސް ކިހިނަކުން ހެއްޔެވެ؟ ޖެހިގެން ހުރި ކޮޓަރީގައި އޭނާގެ ލޯބި ފަސްދާނުލެވިގެންދާއިރު އޭނާގެ ލޮލަށް ނިދި އަންނާނޭ ހެއްޔެވެ؟ ނާންނާނޭކަން ކަށަވަރެވެ. ކޮންމެ މީހަކަށްވެސް އެކަމެއްގައި ހުރި އަސަރު އެގޭނީ އެކަމެއް ދިމާވީމައެވެ…… މިހާރު އޭނާގެ ޚިޔާލީ ލޮލަށް ފެންނަމުންދަނީ އާޞިފާއި ގުލްބާނޫއެވެ. ރީއްޗާއި އިޝްޤުގެ ކުޅިވަރެވެ. އޭނާގެ ފުދުންތެރިކަމެއް ނެތްކަމާއި އެކަނިވެރިކަމެވެ. އޭނާ ހާސްވަނީއެވެ. ނޭވާއަށް ދަތިވަނީއެވެ. އެންމެފަހުން ކެތް ނުކުރެވިގެން ބާލީސްތައް ނަގާ އުކާލައިފިއެވެ. ބެޑްޝީޓް ބޮނޑިބޮނޑިކޮށް ދުރަށް އެއްލައިލައިފިއެވެ. ގޮދަޑީގައި ހިފާ ދަމައިގެންފިއެވެ. ލައިގެންހުރި ހެދުން ވީދާ ކުދިކުދިކޮށްލައިފިއެވެ. އެވަރަކުން ހުއްޓައެއް ނުލައެވެ. ދެއަތުގައާއި އަނގަ ފޯރާހާ ތަނެއްގައި ދަތްއަޅާ ވީދައިގެންފިއެވެ. މޫނުގައި ދެއަތް އަޅާ ރޮއިގެންފިއެވެ. އެރޭގެ ހަތަރުދަމުވެސް އޭނާގެ ޙާލަކީ އެއީއެވެ.
ހޯލްތެރެއިން އަދިވެސް މިޔުޒިކާއި ގިގުނީގެ އަޑު އިވެއެވެ.. ހުނުމާއި ސަމާސާ ކުރުމުގެ އަޑުވެސް އިވެއެވެ. އެއީ މެޙެފިލްގެ ފޯރި އެންމެ ގަދަވެފައިވާ ވަގުތު ކަމަށްވެސް ވެދާނެއެވެ. ކޮންމެއަކަސް އެންމެ އަޑުގަދަވި ވަގުތު ފަރުޖާދު ބަންލާފައި ދޮރު ލައްޕައިލިއެވެ. ހަމަ އެގޮތަށް ކުދިދޮރުތައްވެސް ލައްޕާ ތަންޑު އެޅިއެވެ. އެގޮތުން އަލަތު ދެމަފިރިން ނިދާފާ ތިބި ކޮޓަރިން ފުރޭނިގެން އަންނަ އަލި ފެންނަ ކޮންމެ ދޮރެއް ލައްޕާ ތަންޑު އެޅުވިއެވެ…… އެރެއަކީ ފަރުޖާދަށްޓަކައި ވޭންދެނިވި ރެއަކަށްވިއެވެ. މަރުވެ މަރުވެފައި ދިރުނު ރެއަކަށްވިއެވެ. އެހެންގޮސް ކެތްތެރިކަން ކޮޅުންލައިގެން ދިއުމުން އޭނާ ފުންމައިގެން ތެދުވިއެވެ. ޙަވޭލީގެ ލެބޯޓްރީއަށް ވޭލިއުމް ފުޅި ނެގިއެވެ. އެއިން އޭނާއަސް ކެވުނީ ކިތައް ގުޅަ ކަމެއް ޚުދު އޭނާއަށްވެސް ނޭނގެއެވެ.
ޖެހިގެން އައި ދުވަހު ފަތިސް ނަމާދަކަށްވެސް ފަރުޖާދަކަށް ހެއެއް ނުލެވުނެވެ. އެދުވަހު އޭނާއަށް ހޭލެވުނީ މެންދުރުގެ އެގާރަވެސް ޖެހިފަހުންނެވެ. އެކަން ޙަވޭލީގެ އެންމެންނަށްވެސް މަޖާ ކަމަކަށްވިއެވެ. އެދުވަހުގެ މަޥްޟޫއު ކަމުގައި ވެގެންދިޔައެވެ.
”ހޭލާ ތިބި މީހުން ފަތިހާ ތެދުވެއްޖެއެވެ. އެކަމަކު ކޮއިފުޅަށް ތިޔަ ތެދުވެވުނީ އެގާރަވެސް ޖެހިފަހުންނެވެ. އެމީހުންގެ ނިދިވެސް ކޮއިފުޅުގެ ޙިއްސާއަކަށްވީ ހެއްޔެވެ؟“ ޠޯލިއާ ބޭގަމް ބަނޑުގައި އަތް އަޅައިގެން ގުދަށް އޮވެ ހެމުން ބުންޏެވެ. އެވަގުތު ފަރުޖާދު ފިނިނޭވާއެއްލާފާ ހިތިގޮތަކަށް ހީލިއެވެ……. ހިތާމަ ހުއްޓެވެ! ލޯބި ފަސްދާނުލައިގެން ލޯބިވެރިޔާގެ ކުރިމަތީގައި ދިރިއުޅުމަކީ ކޮންފަދަ އުނދަގޫ ލިބެނިވި ކަމެއް ހެއްޔެވެ؟ ފަރުޖާދު އަސަރާއެކު ވިސްނާލިއެވެ.
*******
